Rossi ngaihthah theih a ni lo - Marquez

MotoGP rider championship hmahruai mektu Marc Marquez chuan Yamaha rider Valentino Rossi chu champion inum kawngah ngaihthah theih a nih loh thu a sawi chhuak.

Tun season-ah MotoGP intlan-siak vawi riat an neih tawh aṭangin Honda rider Marquez hian ṭum hnih hnehna chang tawhin point 145 a hmu tawh a, champion lai Yamaha rider Jorge Lorenzo aiin point 24-in a sang fal mek - season hmasa a pahnihna Rossi chuan point 103 hmuin pathumna dinhmun a luah mek bawk.

Kum 23-a upa Marquez chuan, "Tun dinhmunah chuan Jorge hi khingpui hlauhawm leh khirh ber a nihzia chu ka hrechiang. Ani hi kuminah vawi thum pakhatna ni thei awmchhun a la ni a, a lak aṭanga tlan hlat chu thil theih ni mah se a harsa hle," a ti.

MotoGP champion vawi hnih ni tawh Marquez chuan sawi chhunzawmin, "Kan theihnghilh miah loh tur chu Valentino a ni bawk. Ani hian tawnhriat a ngah tawhin a beidawng ve mai mai ngai lo a, a tawp thlenga min thlahthlam dawn loh avangin ka inthlahdah thiang lo," tiin a sawi.

Kuminah hian intlansiak hmabak 10 a la awm a, Pathianni hian Sachsenring tlankawngah German Grand Prix an tlan leh ang - he hmunah hian tun hnai kum thum chhung chu Marquez hian hnehna a chang ziah a, tun ṭumah pawh hian a chesual a nih loh chuan rider hmuhnawm ber pawl a ni leh tura ngaih a ni.

German Grand Prix an tlanna tur Deutschland tlankawng hi 3.7km a thui niin 12m a zau a ni a, ding zawnga kawi pathum awmin vei kawi 10 a awm thung - kawng ngil thui lai ber chu 700m niin bike chak tana ṭangkai pui tham a ni.