A fanu vangin coach Hassan-a him

Egypt tana goal khung hnem ber Hossam Hassan chu inkhelh zawha police thlalatu a diriam vangin jail tang tura tih ni mah se facebook-a a fanu thu post lungkuai tak avangin lung in a tang leh dawn lo!

Al Masry coach Has-san hi inkhelh zawha thlalatu a diriam avang hian a an khum police pho-to-grapher Reda Ab-delmaged hian court-ah a khing a, mah se Egyptian coach fanu thu ziak a chhiar hnuah a khinna hi a hnuklet leh a ni.

Abdelmaged chuan, "A thuziak khan ka rilru a hneh a, lung ina a pa hmu tura a inngaih avanga a lungchhiat thu a ziak khan ka rilru min thlaktir a ni. Port Said (Al Masry innghahna) khawpui hi ka ngaina a, Hossam Hassan leh a unaupa Ibrahim te pawh Egyptian mipui tana hlimna lo thlen tawh ṭhin an nih avangin ka hmangaih a ni," tiin a khinna a hnuh let chhan a sawi.

Kar hmasa Zirtawpni khan Egyptian league-ah Al Masry leh Ghazl Al Mahalla chu 2-2 in an inhnehtawk a, inkhelh zawha buaina chhuakah kum 49-a upa manager hian photographer hi mawi lo takin a ṭawng khum. Egyptian Football Association chuan Hassan hi £825 (Rs. 74,013) chawi tur leh match thum chhung a team kaihruai thei lo turin an lo hrem tawh bawk.

Hossam Hassan hian player a nih laiin Egypt tan vawi 169 a inlanah goal 69 a lo khung sak tawh a, club pakua tan inlan tawhin inelna hrang hranga match 531-a inlanah goal 234 a khung a, Confederation of African Football chuan kum 50 chhunga African player ṭha berah an lo thlang tawh bawk.