Terry a captain chhunzawm ang - Conte

Chelsea manager thar Antonio Conte chuan media a hmachhawn ta a, kum 35-a upa John Terry chuan captain armband a hren zel tur thu a tichiang.

Mr Chelsea

Season liam ta khan John Terry contract hi pawhsei sak a ni lawk lo a, Chelsea-in an player pawimawh Frank Lampard an chhuahtir tawp tawh bawk avangin 'Mr Chelsea' hminglem an vuah khawpa Blues nena inhmeh Terry chanchinin sawi a hlawh hle.

Italian manager Conte chuan, "Chiang taka ka sawi duh chu, John Terry hi ka tan player pawimawh a nih ang bawkin club leh fan-te tan a hlu a ni. May thla khan kan pahniha kan ngaihtuah hnuah contract thar a ziak a, Chelsea tana khelh zel a duh avangin kan lawm hle a ni. Vawi tam tak kan inbia a, ani pawh contract thar a ziah avangin a hlim hle a ni," tiin Terry-a'n contract a pawhsei khan a inrawlh thu a sawi lang.

Captain a nih tur thu ti-chiangin Conte chuan, "John hi Chelsea captain a ni a, player ropui leh team kaihruai thiam tak player a ni. He club hi a hrechiang a, amah hi team chakna hnar a ni," tiin Terry a la pawimawh reng thu a sawi.

Conte sulhnu

Antonio Conte hian a inkhelh hun laiin Juventus tan league match 296 a khel a, Serie A-ah vawi nga ngawt champion puiin UEFA Champions League nomawi tlengin a chawi tawh. Kum 2004-a football khelh a chawlhsan hnuin club tenau Arezzo, Bari, Atalanta leh Siena te enkawlin Bari hi 2008-09 season khan Serie B-ah a champion pui a, Siena hi 2010-11 season-ah Serie B-ah pahnihna a nih pui bawk.

A club hlui Juventus chuan Serie B nomawi chauh la chawi mah se Conte chungah rinna an nghat a, Italian manager hian Bianconeri hi season thum chhung Italian League-ah champion pui nghalin Serie A coach of the year-ah thlan a ni vek bawk. Conte awm hmaa Juve champion hnuhnun ber chu 2002-03 season (2004-05 leh 2005-06 an champion-na an hlih sak) daih tawh kha a ni a, a sulhnu hi chhuan tham a ni.

Hemi hnu hian Italy enkawl zuiin Euro 2016-ah team
ṭha lo tiin Azzurri chu sawisel mah se a zawna vawi hnih champion tawh Spain bakah champion rinkai Belgium an hneh a, Germany lakah penalty-ah vanduaiin semifinal an thleng zo lo nachungin Conte hnathawh hian fak a hlawh hle.

Conte kalhmang

Italian coach Conte hian 3-5-2 formation hmangin Italy leh Juventus-ah a hlawhtling a, Chelsea-ah erawh kalhmang thar a hmang thei tlat.

Juventus manager hlui Conte chuan, "Team thar ka en-kawl chuan player-te an ṭhatna ber tur position ka ngaihtuah
ṭhin. Manager hi puanṭhui thiam ang an ni a, team mawi theih dan berin an chei tur a ni. Tlarhnunga pathum emaw pali emaw awm kha a pawimawh ber a ni lo. Team phurna leh awm-ze nei taka inremkhawm hi a pawimawh ber a ni," tiin formation lama a buai loh thu a sawi.

Chelsea boss thar hian fit-ness a ngai pawimawh a, tlar-hnung phui ṭha taka rem turin team pumpui ṭanrual a pawimawh zia a hria. Euro 2016-ah khan Italy player-te kha chawhruala field chhunga tlan hnem ber te zinga mi an ni a, hemi chungchang hi sawiin Conte chuan, "Chak tur chuan football ṭha taka khelh theih a ṭul a, chumi tur chuan taksa hrisel ṭhat a pawimawh. Kan tlan tam chuan chakna chance a sang. Rim taka thawh duh mi ka ni a, hlawhtling tur chuan thawhrim a ṭul. Training kan neih tawhah player-te ka duh danin an khawsa a, ka ngaihdan chuan hlawhltinna kawng chu thawhrim a ni," tiin a sawi.

Hmathlir

Kum 48-a upa Conte chuan, "Season tawp thlenga champion beiseina nei turin kan inpeih a
ṭul a, champion tur erawh team pakhat chiah an ni. Chelsea hi Champions League khelpha zingah an awm tur a ni," tiiin Blues chu team ṭha zinga hlankai leh ngei a tum thu a sawi.

Chelsea hian Belgium striker Michy Batshuayi chu pound maktaduai 33-in an lalut tawh a, Conte chuan, "Player naupang tak ni mah se talent a neih ṭhat bakah a ke pahnih a hman theih avangin ka bula a rawn kal hi kan lawm hle a ni. Champion tawh player kher hi ka mamawh lo a, ka duh anga khel thei tur player hi ka duh chu a ni," tiin a player duhzawng a sawi lang.

Blues hi transfer-ah thawm an nei lian chho ṭan a, tunah hian Leicester City midfielder N'Golo Kante nen sawi zawm mek an ni.