Rooney negative mah se inkhung a ngai

Derby County forward Wayne Rooney chu a ṭhianpa Covid-19 positive-in kar liam ta Ningani khan an chenna in a tlawh avangin ni 10 chhung a inkhung hran a ngai dawn. Kum 34 mi England captain hlui hian test hi nei tawhin negative mah se Derby match thumah a khel thei dawn lo.

Rams hian match hnuhnung berah Watford 1-0 in an hneh lo a, Rooney hian nizana Huddersfield an hmachhawn bakah Nottingham Forest (October 23) leh Cardiff City (October 28) nen an inkhelh hunah a tel thei dawn lo.

Rooney ṭhianpa Josh Bardsley hi kum 21 mi a ni a, inkhung hrang tur a nih laiin Manchester United forward hlui te inah hian a kal. English striker hian a ṭhianpa hi inkhung hran ngai tih a hre lo a, a vanduai phah ta a ni.

Derby manager Phillip Cocu chuan, "Kan captain kan chan a ni ringawt lo a, tun hnaiah a fitness-in hma a sawn chho a, a chawl leh tur hi pawi ka ti hle. A thiam loh a ni lo a, demna kan nei lo a, a tel loa kan khelh a ṭul a ni," tiin a sawi.

Rooney erawh a inkhelh theih loh avangin a thin a rim a, pawi a ti a, amaherawhchu a chhungte leh amah an negative avangin a lawm viau thung.