Everton-ah Allan a chiang ta

Premier League club Everton chuan Brazilian midfielder Allan chu Napoli aṭangin an la nghet ta a, a manah hian pound maktaduai 21.7 insengin kum thum chhung atan contract an ziahpui. 

Kum 29 mi midfielder chuan, "Everton ka zawm thei hi ka lawm takzet a, he hmuna ka awm thei hian minti hlim hle a ni," a ti a, nipui transfer-a Everton lakluh player hmasa ber a ni. 

Everton hian Watford midfielder Abdoulaye Doucoure chu lalut turin inremna an neihpui tawh a, Real Madrid aṭanga James Rodriguez lalut turin thui tak an kal tawh bawk.

 

Allan chuan, "Ka career-a ka lo tih ṭhin tawh angin ka khelhpuite nena thawk hoin game hmuhnawm tak kan phochhuah a, hnehna pawimawh tak tak kan chan theih ka beisei. 

"Premier League-a sulhnu nei ṭha tak a ni a, 'Professor' Ancelotti a awm bawk. He club dinhmun leh coach avang hian ngaihtuahna seng buai loin ka lo kal a ni," a ti a, Napoli-a a boss hlui Carlo Ancelotti chu Merseyside club a zawm nan a ṭangkai thu a sawi. 

Brazilian club Vasco da Gama aṭanga a career ṭantu Allan hian kum 2012 khan Serie A club Udinese zawmin European football-a a career a ṭan a, kum 2015 khan Napoli-a zawm.

Napoli tan match 212 khela goal 11-a khung hnuah Everton a pan a, Brazil tan vawi kua a inlan tawh bawk. Copa America 2019-a Brazil an champion khan team-ah a tel a, Everton forward Richarlison-te nen an khel ho a ni.