Buttler-a'n Rajasthan chakpui

Rajasthan Royals chuan Thawhṭanni zan khan Chennai Super Kings chu wicket sarihin an sawp a, Jos Buttler-a'n thi loin run 70 a siam. Royals hian point riat hmuin panganaah an invawrh chho a, Chennai erawh point ruk hmuin table mawngphahah an awm.

Indian Premier League-ah hian vawi hnih ṭheuh an inkhelh chhuah hnuah a sang pahnihin Qualifier 1 an khel dawn a, heta chak zawk hian final an khel dawn. Pathumna leh palinain Elimnator round an khel ang a, heta chak zawk leh Qualfiier 1-a chak lo team-in final khel tur an zawng leh ang.

India captain hlui MS Dhoni-a'n nikum Cricket World Cup semifinal-a New Zealand an hneh loh hnuah cricket khel lo vang vangin IPL-ah a rawn kir a, amaherawhchu beisei angin amah leh a naute an che ṭha lo.

Rajasthan lakah hian Dhoni-a'n bat hmasak a thlang a; Ravindra Jadeja (35*), Dhoni (28) leh Sam Curran (22) ten mualpho lohna tawk run siam mah se an strike rate a ṭhat loh avangin over 20-ah run 125/5 chiah an tlin. 

Rajasthan lam tan target harsa a ni lo a, amaherawhchu opener Ben Stokes (19) leh Robin Uthappa (4) bakah Sanju Samson (0) te an chet ṭhat loh avangin Chennai-in beiseina an nei hman.

 

Captain Steve Smith-a'n dawh thei takin ball 34-ah run 26 a siam a, Jos Buttler-a'n risk lain ball 48 lekah thi loin run 70 a siam. English batsman hian Rajasthan chu over 17.3 lekah run 126/3 siamin hnehna a chanpui.

Rajasthan hian an chunga awm Kolkata point hnih chiahin an phal lo a, match li khelh tur a la awm avangin beisei tur a la awm. Hetihlai hian Chennai Super Kings erawh match 10 aṭanga point ruk chauh an la hmuh avangin hmabak a harsa ang.

Zanin dar 7:30 hian Kolkata Knight Riders leh Royal Challengers Bangalore te an inkhel dawn a, table-a pathumna leh palina hauhtu an nih avangin inkhel hi a pawimawh hle.