Singh is King Vijender Singh hmaah ding zo an awm lo!

October, 2015-a a professio-nal boxing match hmasa ber khel ve ṭan chauh Vijender Singh chuan mi pasarih a hma^-chhawnnaah champion kawng-hren a hreng der - Indian boxer hian WBO Asia Pacific Super Middleweight kawnghreng hreng turin Inrinni zan khan WBC European champion Kerry Hope chu 98-92, 98-92, 100-90 in a hneh a ni.

Thyagaraj Sports Complex, New Delhi-a inhnekah hian kum 30-a upa boxer hian round 10 chhungin ro a rel tluan chhuak zak a, ṭantu ngah boxer hmaah hian mikhual tlangval Kerry Hope-a'n tih theih a nei tlem hle. Boxer pahnih inhmachhawn hmain tawnhriat ngah zawk Kerry Hope-a'n hnehna a chan ringtu tam zawk mah se Vijender Singh-a'n a kut vei lam hman thiam chhawr ṭangkaiin beisei loh lam aṭangin Australian boxer hmaiah a khilai ṭhin a, a tawpa dingchang zawk chu Indian tlangval a ni.

Ram tan

Inhnek a zo a, beisei ang ngei-in Vijender Singh chu chak zawkah puan a ni. Mipui thawm ṭha tak karah Indian boxer chuan, "He hnehna hi Muhammad Ali tan ka hlan e. He inhnek hi ka tan a ni lo a, ka ram tan, India tan a ni," tiin a chawr chhuahna ram a theihnghilh lo.

Feet ruk-a sang boxer chuan sawi chhunzawmin, "He kawng-hren hi kei, ka trainer, promoter leh team pumpuite nen rim taka kan thawh hnua ka hlawhchhuah a ni a, a hlu a ni," tiin a champion theih chhan chu a thawhrim vang a nih thu a sawi.

Vijender Singh inhnek lai en tur hian India rama hming langsar tak tak zingah Congress leader Rahul Gandhi, boxer M C Mary Kom, wrestler Yogeshwar Dutt, cricketer Virender Sehwag, Yuvraj Singh, Suresh Raina, actor Randeep Hooda-te chu tlarhma luahlumtu an ni a, amah ṭawiawmtute Indian boxer hian a theihnghilh lo.

Kum 2010 Asian Games-a India tana gold lo la tawhtu boxer chuan, "Min ṭawiawmtu fan-te chungah lawmthu ka sawi a, infiammi, lemchan thiam leh politician min ṭawi-awmtute chungah ka lawm takzet a ni. Zanin hi a bul ṭanna chauh a ni," tiin hmachhawp tam tak a la neih thu a sawi.

Tu nge Vijender?

Haryana-a thingtlang khaw pakhat Kaluwas khawchhuak tlangval tan chuan vawiina a thlen chin ringawt pawh hi inchhuanpui tham a ni a, ṭhiante zinga insawitheihna tham a ni.

Vijender Singh hian profes-sional boxing a luhchilh hmain India tan inelna hrang hrangah a lo feh chhuak tawh ṭhin a, kum 2008 Beijing Olympic-ah khan India tan bronze medal lain Indian boxer zinga hetiang dinhmun thleng thei hmasa ber a ni - Vijender a hawikir tawh lo.

Kum 2009 khan Interna-tional Boxing Association (AIBA) chuan kumtin a tih ṭhin angin ranking a tichhuak a, Indian tlangval Vijender hi middleweight category-ah world number 1 a ni.

India tan a fehchhuahnaah Commonwealth Games-ah silver pahnih leh bronze pakhat a awrh tawh a, Asian Games-ah gold pakhat leh silver pakhat lain Asian Championship-ah silver pakhat leh bronze pakhat a la tawh a, kum 2009 khan Milan khawpuia World Championship-ah bronze a dawng bawk.

Vijender-a zinkawng

Olympic-a bronze medal a lak avanga hriat hlawh tak boxer hian bollywood lamah te pawh movie a lo chang ve zak zak tawh a, nikum khan professional boxing luhchilh ṭanin Queensberry Promotions nen thawkdun turin contract an ziak.

October, 2015 khan a pro-fessional match hmasa ber khelin Manchester Arena-ah Sonny Whiting a hmachhawn a, British boxer hi round thum an khel hman chauh tihin technical knock out hmangin a hneh.

Inrinni zana a champion kawng-hren a hren hma hian Vijender-a'n vawi ruk chiah in-hnek a la hmachhawn a, a khingpui zingah ngam loh a tawng lo mai niloin a knockout vek! Indian boxer hian Delhi khawpuia inhnek a hmachhawn hma hian round nga aia rei a khingpuite tudawl turin hun a mamawh ngai lo.