NorthEast enkawl tur Portugal coach hlui

Indian Super League club NorthEast United chuan beisei loh taka an coach Sergio Farias-a'n Thai Premier League club a zawmsan hnuah an coach thar atan Portugal coach hlui Nelo Vingada an lalut.

Kum 63-a upa manager hian season hman zawh takah khan Portugese Super Liga club CS Mari-timo-a enkawl a, January aṭanga a enkawl ve ṭan chauh team hi table-ah 13-na dinhmun bak a luahpui theih loh avangin May khan a hna aṭang hian chawlhtir a ni. Hetichung hian Portuguese League Cup-ah erawh final a hruai thleng thung.

'The Professor' tia hminglem an vuahsak manager hian football coaching khawvelah kum 35 deuh thaw a hun a hmang tawh a, Real Madrid manager hlui Carlos Queiroz-a hnuaiah assistant manager lo ni tawhin Portugal U-20 chu FIFA U-20 World Cup-ah a zawnin 1989 leh 1991 khan an champion pui a, Portugal golden generation tia hminglem an vuahsak ṭhin Rui Costa, Abel Xavier leh Luis Figo-te ho kha a kaihruai ṭhin.

Manager puitling niin Portugal team a kaihruai tawh a, kum 1995 FIFA U-20 World Cup-ah khan U20 chu pathumna a nihpui bawk. A ram enkawl tawh zingah Saudi Arabia chu kum 1996 khan Asian Cup-ah a champion pui a, 1998 World Cup a khelhpui bawk.

Egyptian club Zamalek SC a enkawl laiin league, CAF Super Cup, Saudi-Egyptian Super Cup leh Arab Champions League-ah te season khat chhungin a champion pui vek a, South Korean club ṭha FC Seoul chu league nomawi bakah League Cup-a lo chawipui tawh a, Asia ramah pawh a mikhual lo hle.