Chelsea player thar N'Golo Kante

Chelsea chuan Leicester City midfielder N'Golo Kante chu kum nga chhung atan pound matkaduai 30 bawr velin an lalut.

Defensive midfielder Kante hian nikum nipui khan Ligue 1 club Stade Malherbe Caen aṭangin pound maktaduai 6-in Foxes hi a zawm a, season khatnaah hian inelna hrang hrangah match match 40 khelin Premier League-ah an champion. Kum 25-a upa Kante hi Euro 2016-ah France team-ah telin final-ah Portugal an hneh lo.

France international midfiel-der Kante chuan, "Europe-a club lian ber zinga mi tana ka inziaklut thei hi ka lawm hle a, ka tan chuan duhthusam a thleng dik a ni. Coach fing tak Antonio Conte leh player ṭha tak tak nena thawhdunna remchang ka nei hi ka tan chuan a lian lutuk a, hnawl phal chi a ni lo," tiin London club sawmna chu hnar phal chi a ni loh thu a sawi.

Chelsea hian Marseille a-
ṭang-in Belgian striker kum 22-a upa Michy Batshuayi chu pound maktaduai 33 bawr velin an lalut tawh a, Kante hi Italian coach Conte hnuaia an player ziahluh pahnihna a ni. Juventus coach hlui Conte chuan, "Blues hian insiamṭhat a mamawh a, chumi tur chuan player thar lakluh a mamawh. Team tichak thei tur player pakhat, pahnih emaw pathum tal chu kan lakluh theih kan beisei," tiin thuthehdarhtute a hmachhawn hmasak berah a lo sawi tawh a, pahnih an lakluh takah chuan pathumna lalut turin hma an la leh nghal ang.

Blues technical director Michael Emenalo chuan, "N’Golo khelhdan hmang hi Antonio Conte kalphung nen a inmil thlap a, a theihna danglam tak avang hian kan team-in an ṭhatpui ngei ang tih hi ka ringhlel lo," tiin an player thar chungchang a sawi.

Blues an chak lo

Pathianni zan khan Austria-ah Chelsea-in Conte hnuaia an match hmasa ber an khel a, friendly match-ah Rapid Vienna 2-0 in an hneh lo. Blues chak loh ṭum hian John Terry, Diego Costa, Oscar, Willian, Loic Remy leh Branislav Ivanovic te an inlan.

Kum 46-a upa Conte chuan, "Kan chak lo hi pawi ka ti a, champion nomawi lak let kan tum avangin tuna aia rima kan thawh a ṭul a ni," tiin inkhel chungchang a sawi. Italian manager chuan player thar chungchang sawiin, "Thahrui a ngah a, theihna a nei a, ka player duh chi tak a ni. Central midfielder pahnih kan chhawr dawn a nih chuan Kante hi a ṭangkai khawp ang," tiin a sawi.

Leicester tan channa

Premier League-a Leicester champion puitu Ranieri chuan, "Kante hi Euro hma khan contract thar kan zawrh tawh a, tunah erawh kan midfielder lakluh duh hi club tam tak an awm tawh a, engkim hi ama kuta awm a ni," tiin a lo sawi tawh a, French midfielder hian a duhthu ngeiin Foxes a chhuahsan.

Leicester City forward Jamie Vardy-a'n Chelsea aia sulhnu nei ṭha zawk Arsenal sawmna a hnawl a, amaherawhchu Kante-a'n Blues sawmna a hnar theih tak lohah chuan winger Riyad Mahrez hmalam a chiang lo. PFA Player of the Year Mahrez hian kum 2014 khan Le Havre aṭangin £375,000 lekin Leicester hi a zawm a, nikum August thla khan contract thar ziakin kar khatah £35,000 a hlawh. Tunah hian kum thum daih contract la nei mah se Mahrez hi kar khata £80,000 hlawh turin an sawm a, Algeria winger hian a hnawl niin thuthang a awm.

Italian manager Ranieri chuan a player pawimawh Mah--rez hi a chhuah loh tur thu uar takin sawi mah se a agent Kamel Bengougam chuan, "Riyad hi Leicester-ah a hlim a, Champions League an khelh dawn bawk avangin cham zel pawi a ti lo. Chutihrualin tuna a kum chhut hian club lian zawk aṭanga sawmna a awm a nih chuan ngaihtuah ṭhat a ngai ang," tiin chhuak theih a nih thu a sawi.

Ngaihnawm

• Foxes assistant manager Steve Walsh-a'n manager Claudio Ranieri bulah Kante a sawi hmuh tirhin Italian manager hian a pa tet vangin French midfielder (5 ft 6 1/2 in) hi Premier League-ah a ṭhat theih a beisei lo.

• Leicester training ground-a Kante a kal hmasak berin club staff te chuan naupang emaw tiin 'I nu i nghak a mi?' tiin an zawt.

• Claude Makelele leh Kante khelhdan hi a inan thu an sawi ṭhin a, French midfielder hi a player entawn ṭhin an zawh chuan Real Madrid midfielder hlui a ni lo. Kum 2005-07 chhunga Chelsea tana lo khel tawh Lassana Diarra a ni.

• March 17, 2016 khan France tana a match hmasa ber khel turin koh a ni a, ni riat hnuah a player ngaihsan Diarra thlakin Netherlands 3-2 an hneh ṭumin ram tan a vawi khat nan a inlan. A piancham March 29-ah a vawi khat nan starting eleven a chang a, Stade de France-a Russia 4-2 a an hneh ṭumin goal hmasa ber a khung.