Olympic khel lo tur Raonic

Wimbledon 2016 finalist Milos Raonic chuan 'Zika' vangin Rio Olympic khelh a tum lo a, world number 8 Tomas Berdych leh hmeichhe number 5 Simona Halep te pawhin he hrileng mek vang hian Brazil khawpui hi an pan ve dawn lo bawk.

Thosi seh aṭanga kai theih Zika hi Summer Olympic thlenna tur Brazil-ah a leng nasa a, World Health Organi-zation lam chuan infiammite tan a hlauhawm loh thu leh khaw vawh lai a nih avanga he natana hi a darh chak loh tur thu sawi mah se infiammi tam takin an kal hreh phah tih a chiang.

Zika vanga Olympic a khelh loh tur thu sawiin world number 6 Raonic chuan, "Ka hriselna vawn ṭhat nan Rio-ah ka kal ve dawn lo, he ka thuthlukna hian infiammi
ṭhenkhat a tih lunghnur loh hram ka beisei. Canada team ten hun ṭha taka an hman theih nan duhsakna ka hlan," tiin an ram aiawha kal turte duhsakna a hlan zui bawk.

Romania star Halep chuan nau-piang thluaka thawk thei natna hri Zika vanga an ram aiawh lo tur a nih thu a zep bik lo, "Chhungkua hi a pawimawh a, tennis ka khelh loh hnuah pawh tih tur ka la ngah avangin ka hriselna hmalam hun ka ngaihtuah a
ṭul," tiin a sawi ve bawk.

Wimbledon final pawh lo khel ve tawh Berdych chuan hrileng vanga a inlan loh tur thu sawi pahin a fan-te chungah ngaihdam a dih nghal a, United States star John Isner erawhin ATP tournament a ngaihpawimawh vanga a inlan loh tur thu a sawi thung a - Nick Kyrgios erawh Australian Olympic Committee (AOC) nen an inhmuh thiam loh vanga inlan lo tur a ni thung.

Zika hrileng hlauh vang hian Golfer 20 chuang zet chuan Olympic-a an tel loh tur thu an lo sawi tawh bawk.