Ukraine coach thar Shevchenko

Ukraine chuan an ram chanchina goal khung hnem ber Andriy Shevchenko chu an head coach thar atan an ruat. Kum hnih chung atan contract hi ziah niin a ṭul dana zirin kum hnih dang pawh sei theih tura tih a ni.

Ram tan match 111 a khelh aṭanga goal 48 khungtu Shevchenko hian kum li chhung an ram team lo enkawl tawhtu Mykhaylo Fomenko hmun-ruak a luah ang.

AC Milan leh Chelsea striker hlui hian kum 2012 khan inkhelh a chawlhsan a, Euro 2016-ah khan Ukraine coach Fomenko-a hnuaiah assistant hna thawkin group stage-ah Germany, Northern Ireland leh Poland te hneh loin knock out round an lut lo.

Ukraine-in an ram chanchina FIFA World Cup an khelh hmasak ber 2006-a an captain Shevchenko hi tun hmain head coach a la ni ngai lo a, tun ṭum hi a vawi khatna tur niin Milan-a a khelh laia assistant coach leh Italy defender hlui ni bawk Mauro Tassotti leh Dynamo Kyiv coach hlui Raul Riancho ten an puibawm ang.

Kum 39-a upa Shevchenko hna hmasa ber tur chu 2018 Russia World Cup qualifying atan September 5 khian Iceland an lo mikhual ang a - Group I-ah Croatia, Turkey, Finland leh Kosovo te nen an inel zui dawn a ni.