Player-ten chawlh an mamawh - Wenger

Arsenal manager Arsene Wenger chuan a player ṭhenkhat international match khelte chuan hahchawlh nan hun an la mamawh thu a sawi a, chumi hnuah hlawhtlin duhna thinlung nen club training an zawm a beisei thu a sawi lang tel bawk.

Tun nipui chhungin Alexis Sanchez chuan a zawna a vawi hnih nan Chile chu Copa America-ah a champion pui a, best player-ah thlan a ni. Olivier Giroud leh Laurent Koscielny te pawhin France chu Euro 2016 final thlen pui mah se a chak lo lamah an ṭang thung.

Midfielder Aaron Ramsey leh Mesut Ozil te pawhin Wales leh Germany chu European Championship-ah semifinal an hruai thleng ve bawk - heng player-te ko let tur hian Wenger a hmanhmawh hran lo niin a lang.

A player-ten chawlh an ma-mawh thu sawiin Wenger chuan, "France khan inkhel an hmachhawn hnem a, ngaiawh leh tur chuan kar thum emaw kar li emaw chawlh an mamawh ang. Chumi hnuah hlawhtlin châka tuihal chungin min rawn zawm ve leh ang," tiin a sawi.

Gunners manager chuan sawi chhunzawmin, "Ramsey leh Alexis te khan tawn hriat an ngah pah hle ang tih chu ka chiang a, Giroud leh Koscielny te pawhin an beisei ang thleng phak lo mah se an hun tawnah hlawkna an chan ngei ka ring. Ozil pawh France an hneh loh hnu khan kan inbe tawh a, a lungngai hle tih ka hria. Mahse, a inkhel kha ka en a, a khel chhe lo," tiin a naute ho chanchin a sawi.

Premier League pahnihna Ar-senal hian season thar inbuatsaih nana an match hmasa ber atan Zirtawpni hian Stade Bollaert-Delelis-ah League 2 club RC Lens an hmachhawn ang. July 28 hian San Jose-ah MLS All-Stars an hmachhawn leh anga, July 31 khian Los Angeles an inkhelh pui leh bawk dawn - an match hnuhnung ber atan August 7 khian Manchester City nen an inhmachhawn ang.