Leeds mualah Wolves an chak

Wolverhampton Wanderers chuan an striker palian Raul Jimenez goal khat hmangin Leeds United 1-0 in an hneh a, season bul ṭan fuh tawk lo mah se Nuno Espirito Santo naute an khel ṭha leh tawh hle.

Thawhṭan zan Premier League inkhel dangah West Brom chu an mikhual Burnley nen goal awm loin an inhnehtawk, team pahnih hi table hnuai lamah tlak hlauhthawn awmin an awm chhunzawm.

Leeds leh Wolves an inhlau lo tawn a, chutih rualin attacking game hmuhnawm khel ṭhin team pahnih hian goal hlauhawm erawh an nei tam lem lo thung. A tawpah erawh goal khat hmang chauhin an dinhmun a dai dang.

Wolves defender Roman Saiss-a'n second half tir lamah tawih zetin goal khungah a inngai, mahse VAR entu Michael Oliver-a'n offside a ti a, match referee David Coote pawhin he goal hi a pawmsak zui ta bik lo.

Goal kan hmu mai lo, minute 70-naah Jimenez chuan box pawnah ball a chang a, na vak loin goal zawnah a pet. Keeper goalkeeper Illan Meslier-a'n ball lo dan tum mah se a hma a ding midfielder Kalvin Phillips chuan lo tauh pialin keeper rin loh lamah a lut.

Hnehna chang ni se la chuan Leeds United khan table-ah pathunna dinhmun an luah hial ang, Manchester City laka point hlawh chhuak thei team hi kumin February thla hnua a vawi khat nan an mualah an tlawm a, point sarih neiin 10-naah an awm a ngai ta zawk.

Leeds coach Marcelo Bielsa chuan, "Hun ṭha kan insiam hnem tawk a, mahse kan chhawr ṭangkai thei si lo. Kan inkhelah khan tharum hman hnem a ngai hle, chak lo mah ila team ṭha lo zawk kan ni tihna erawh a ni bik lo," tiin a sawi.

Goal an phurh hmain hmatawng Patrick Bamford-a'n hun ṭha nei mah se keeper Rui Patrício a paltlang zo lo, goal an phurh hnuah midfielder Pablo Hernandez chuan sut theihna hun ṭha nei ve leh bawk mah se a vannei bik chuang lo.

Season bul ṭanna league match pahnihah an tlawm a, tunah chuan a zawnin vawi thum an chak leh ta. Manager Nuno-a ringzo lotu awm hman mah se tunah chuan thil tih hmangin a chhang let leh tawh, team hmuhnawm zingah an tel leh der tawh a ni.

Nuno Espirito Santo chuan, "A tir lamah khan harsa viau mah se second half-ah erawh hma kan sawn hle, kan goal khung kha vanneih vang chu a ni ngei mai, chutih rualin khami chauh lo pawh kha hun ṭha dang kan insiam thei," tiin a sawi.

Wolves hian first half-ah ball possession 31% chauh an chang a, chuti chung chuan an goal an venghim thei. Inkhel chawhnu lamah tlemin hma sawn deuh mah se ball erawh an la chang tam chuang lo, amaherawhchu an mamawh hunah tak goal an khung.

Inkhel dangah West Brom leh Burnley te goal lut loin an inhnehtawk, tun season Premier League match khelh tawh chinah goal lut loa inhnehtawk a awm hmasa ber a ni a, team pahnih hian chak ni hmel an la hmu lo chhunzawm.

Mualneitu West Brom tan Filip Krovinovic chuan minute thumna lekah hun ṭha nei mah se goal ban hrulah a pet chhuak a, forward Karlan Grant-a'n goal khung ve mah se offisde vanga hnawlsak a ni - point khatah an lungawi a ṭul.

Mikhual Burnley lamin ball chang tlem mah se goal hmaah an hlauhawm zawk, Chris Wood-a'n goal bar a tauh per a, Ashley Barnes khung tur chu keeper Sam Johnstone chuan a lo dansak bawk.