UK-ah Sindhu inenkawl dawn

Badminton world champion PV Sindhu chu United Kingdom-ah inenkawl turin a kal, a taksa ti chak zual tur leh training nei turin a zin chhuak a, thla hnih vel awm tur anga sawi ni mah se a cham chen tur tak erawh a la sawi chiang lo thung.

Badminton Asso-ciation of India chuan Tokyo Olympic inbuatsaih nan Hyderabad-ah India player ṭha ho chu ngawrh takin training a neih pui reng a, training camp an neihna chhuahsanin Sindhu hian UK a pan - a chhuah tur thu hi BAI hnenah a hrilh hmasa a ni.

Coronavirus vangin kuminah badminton inelna a awm mumal lo. March thla khan All England Championship khelh a ni a, chumi hnuah an chawl ngar ngar. Kar hmasa khan Denmark Open khelh leh a ni chauh a, kuminah inelna dang a awm chhunzawm lo ang.

Media ṭhenkhat tarlan dan chuan India camp a an kalphung leh ruahmanna neih danah Sindhu hi a lungawi tawk lo nia sawi a ni a, amaherawhchu Rio Olympic silver medalist Sindhu erawhin lungawi loh vang ni loin, a ṭha zawk beiseina vanga UK pan a nih thu a sawi.