Bagan tan Krishna bawk

ATK Mohun Bagan chuan Indian Super League inkhelah FC Goa chu 1-0 in an hneh a, goal awmchhun hi Roy Krishna-a'n minute 85-naa penalty aṭanga a khung a ni. 

Team pahnih hi goal khung loin an inṭhen mai dawn niin a lang hman a, mahse, Khasi defender Aibanbha Dohling chuan minute 84-naah Roy Krishna chu chiang zetin a kalh thlu. 

Kum 33 mi Fijian striker hian a hun ṭha neih hi goal-ah a chantir zui a, 1-0 in Mohun Bagan an chak - FC Goa tan si phurh sut letna hun a awm tawh lo a, Krishna-a'n tun season-ah match ruk khelin goal nga a khung ta a, goal khung tam lamah Jamshedpur FC striker Nerijus Valskis (6 goals) leh FC Goa striker Igor Angulo (6) chiah a tluk lo. 

Nilaini zana ISL inkhelah Mizo awm lohna team pahnih an intawng a, zanin dar 7:30-ah erawh ISL-a Mizo player langsarhna NorthEast United leh Jamshedpur FC an intawng dawn. 

Highlander captain pali zingah midfielder Lalengmawia (Apuia) a tel a, midfielder Lalrempuia Fanai leh Rochhar-zela-te player ṭangkai an ni a, striker Lalkhawpuimawia chu quarantine vanga training a zawm lawk theih loh avangin a la inlan lo thung. 

Jamshedpur tan match hnuhnung bera red card vanga a inlan theih loh hnuin Laldinliana Renthlei a inlan leh thei tawh dawn a, left back Ricky Lallawmawma, midfielder Isaac Vanmalsawma leh striker William Lalnunfela-te chu player pawimawh an ni bawk.