Johnson lakah Cilic chak lo

US Open champion hlui Marin Cilic chu Steve Johnson hneh loin Cologne Championship-ah a chak lo, Croatian tlangval hi hard court inelnaah hian hneh nei loin a tla nghal tihna a ni.

Thawhṭanni zan inkhelah Johnson hian 7-6 (3), 6-4 in hnehna a chang, second round-ah chuan Damir Dzumhur leh Alejandro Davidovich Fokina inkhela chak zawk a hmachhawn chhunzawm leh ang.

Inkhel dangah seeded pariatna Adrian Mannarino chuan Alexei Popyrin 6-2, 6-2 in a hneh a, Mannarino hian a match lehpekah chuan Miomir Kecmanovic a tum leh dawn a ni. Japanese player Yoshihito Nishioka pawhin Kyle Edmund 6-4, 6-0 in a hneh.

Inelnaah hian Andy Murray pawhin inlan tumin hming a pe lut hman, mahse hri leng vanga harsatna awm thei ngaihtuahin world number 1 hlui hi a inhnukdawk leh. Britain tlangval hian season tawp hmain tournament dang a la khel hman tura beisei a ni.