Arsenal-in Liverpool inkhel an en

Anfield-ah fiahna hma-chhawn turin Arsenal an lenglut a, Mikel Arteta nauten an zirchhuah chu Premier League nomawi beisei turin an la ṭha tawk lo tih hi a ni. 

Season bul ṭan ṭha tak Arsenal-in Anfield-ah Alexandre Lacazette hmangin goal hmahruai khung mah se team huaisen Liverpool chhaih kawlhna goal a chang a, a tawpah 3-1 in an tlawm. Liverpool tan Sadio Mane, Andy Robertson leh Diogo Jota-ten goal khat ṭheuh an khung a, pound maktaduai 45 man Jota-a'n Reds tana a league match hmasa berah goal a khung nghal. Premier League champion lai Liverpool-in an league match hmasa pathumah hnehna an chang vek a, Leicester City leh Everton nen tun season league match thum khel tawh zinga la chak vek awmchhun an ni. 

Anfield a inkhelah rin lawk ang ngeiin Liverpool-in ball an chang tam zawk a, Arsenal goal-ah an nawr na zawk - minute 25-na lekah Lacazette hmangin Gunners-in goal an khung hmasa zawk a, Andy Robertson chetsual vang a ni. 

Mahse, Arsenal fan-te hlim au thawm pawh a reh hmain Liverpool-in an nawr let a, Mohamed Salah shot ṭha tak Arsenal goalkeeper Bernd Leno-a'n a dan per chu Sadio Mane ke bulah tak a tla. Khel ṭha em em mai Mane tan Leno dan per hi khung loh chi a ni lo a, si phurh sut nan a hmang. Mane hi Kieran Tierney-a nghawk avanga yellow card chauh pek a nih avangin a vannei takzet bawk. 

Minute 34-na a ni a, Liverpool full back duhawm pahnih inkawp fuh lai kan hmu -  Trent Alexander-Arnold siamsak ṭha tak chu Robertson chuan goal-ah a chantir a, a tir lama a chetsual chu a thai reh rang hle. 

Liverpool-in  inkhel an thunun chhunzawm a, Arsenal-in hnai taka inkhel en turin Anfield an pan a ni ber - minute 80-naah Jurgen Klopp-a'n Reds fan-te hmuh chak thlentirin Jota a luhtir a, Mane 

a thlak. 

Pound maktaduai 45 thlenga a man sang chho thei tura Wolves aṭanga Liverpool-in an lei forward hi Anfield-ah a tlangnel nghal a, minute 88-naah a club thar tana a league match hmasa berah goal a khung nghal. Jota hian goal a khung hma pawh hian khung theihna remchang vawi hnih a nei - vawi khat chu goal net sir lamah a pet a, Mohamed Salah hmasial vangin a hun ṭha neih dang a chan tiin a sawi theih bawk. 

Liverpool manager Klopp chuan, "Diogo Jota ka lawmpui takzet a, kum hnih thum chu ka en thla tawh a, tunah chuan kan nei thei ta. Keini team ang rawn thuam ṭhat belhchhah hi chu thil harsa tak a ni," a ti a, Jota a fak. 

Gunners-in Arteta an neih hnuah hma an sawn tih phat rual a ni lo a, FA Cup a an champion hnuah Community Shield nomawi an chawi a, league a an match hmasa pahnihah hnehna an chang bawk. 

Mahse, Liverpool lakah Arsenal hlimthla tak tak a lang chhuak a, season hmasaa point 18 a sang fal chunga champion thei Reds nen tual khata chai tur chuan Gunners hian hun an la mamawh. 

Lacazette-a'n goal a khung bakah 2-1 a an hnufual laiin goal khungna remchang a nei a, Alisson chauh a hmachhawn chungin a pet goal thei lo. Brazilian keeper thiamna hmuh hmaih theih a ni lo a, chutihrual chuan Arsenal hian nomawi lian tham beisei tur chuan Lacazette aia 'class' striker an mamawh niin a lang. 

Kil tin aṭanga khaikhinin Arsenal hian Liverpool an la thlau tih a lang a, Ningani zan dar 12:15-ah Carabao Cup last 16 khel turin Anfield an leng lut leh dawn a, result dang hawn tawh an beisei ang. 

Jurgen Klopp-a hnuaia Liverpool danglamna an sawi ṭhin chu goal chhuah hmasaa an ṭan pawha an hnual ngai lo hi a ni a, chu chu Arsenal lakah pawh chiang takin kan hmu. Premier League season ṭan hmaa ngaihdan awm saah chuan Liverpool hi Manchester City nen bawk nomawi inchuh tura beisei an ni a, City erawh Leicester City laka an tlawm ṭumin season hmasaa an buainaah tho khan an la buai niin a lang. 

Tottenham Hotspur khelh dan enin top four pawh an sual leh viau tura ngaih a ni a, Chelsea hi in la ṭha viau mah se Frank Lampard sawi anga nomawi beisei tur chuan dah an harsa. Manchester United match hmasa pahnih en tan City leh Liverpool nen huang khata dah chi an la ni lo tih a lang a, Leicester leh Everton hi rei daih tura rin an harsa - a tawp kharna chu Liverpool bawk hi nomawi chawi tura beisei an ni leh dawn, tih hi a ni. 

Liverpool-in Arsenal an hneh hnu lawkah Jurgen Klopp chu Sky Sports lamin live-in an kawm a, Liverpool legend  Jamie Carragher-a'n inkhel a thlirlet danah Klopp hlim viau mah se Manchester United captain Roy Keane-a ṭawng danah erawh a lawm lo hle. 

Klopp hian Keane chuan Liverpool khelh dan a nung tawk lo tia a sawi niin a hria a, "Ka hriat dan hi a dik em? Keane khan kan khelh dan a nung tawk lo niin a sawi em ni? A sawi tiraw?" tiin a zawt a, a cho sak sak hle. Keane chuan, "Ka ngaihdanah chuan Liverpool khan an chance neih vawi hnih an hloh a, Klopp hi a lawm loh ka ring a ni," a ti a, German coach-in ngawih mai a tum lo. 

"Keane khan kan khel a nung tawk lo niin a sawi a ni lawm ni? Chu chu ka hre leh duh a ni. Ka hre sual a ni mai thei a, game dang daih a sawina pawh a ni mai thei. Kan inkhel a sawina kha chu a ni thei lo ang. Ka tihpalh a ni a, a thlirna kha a danglam hle," a ti a, a la duh tawk lo cheu!

Klopp chuan, "Kan inkhelah khan a nung lo lai sawi tur pakhatmah a awm lo. Tun hnaia 100%  a khel ṭha team kan thunun a, counter-attack lama min nawr buai loh nan kan fimkhur em em bawk. Zanin game-ah khan sawisel tur ka hre lo a, inkhel nung lo anga sawi nen chuan a letling thawk a ni," a ti. A tawpah Keane hi a tlawm zawkah ṭangin, Sunderland boss hlui chuan, "Ka ṭawng i hre sual a ni mai thei. Inkhelah khan nung lo lai a awm zauh a, mahse ka ngaihdanah chuan inkhel ṭhain ka fak hle che u a ni. Ka thusawi i hrechiang lo a ni mai thei a, a vaia i ngaihthlak a ngai a ni," tiin Klopp-a hrilh a, German coach hian nui chungin, "Ka lo ngaithla ngei ang," a ti zui. Mahse, player a nih lai pawha sual thiam tak Keane hian Klopp-a kalsawn hnuah, "A rilru a no hle mai, a chak lo zawk lam ni se eng ang tak ni ang maw?" a ti leh hram a, Klopp a nui tawh kher lo ang.