Vawi nga champion thei Australia

ICC World Cup 2015 khelh zawh a ni a, champion chu cricket atchilh ram Australia an ni. Australia hian an ṭhenawm ram leh World Cup an thlen ṭawmpui New Zealand chu final-ah harsatna awm loin an hneh a, cricket khawvel thununtu an nih zia an tilang.

Australia mipui hlimin an lam a, a ram pumpui titi chu Cricket World Cup-a an champion thu hi a ni. A awm lo hran lo, Prime Minister tih loh a thu ber chu Australia cricket team captain a ni an tih ṭhinna ram kha a ni miau!

World Cup champion ngun ber

Kumin World Cup khelh a nih hma khan Australia hi Cricket World Cup-ah vawi li an champion tawh a, anni aia champion hnem an awm lo. He record chhuanawm tak hi Australia in an belhchhah a, tunah chuan an record a ṭha fal tawh hle.

Australia tih loha World Champion ni ngun ber chu West Indies leh India an ni a, vawi hnih ve ve champion tawhin Aussie an phak lohna hi a la tam hle. West Indies phei hi chu an champion-na a rei tawh khawp a, kum 1975 leh kum 1979 daih tawh kha a ni! India hi kum 1983 leh 2011 champion an ni thung.

Phil Hughes a tan

Australia captain Michael Clarke chuan Cricket World Cup-a an champion na chu an ṭhianpa Australia tana khel ṭhin kum 25-a upa lek nichunga inkhelh laia boral Phil Hughes tana an hlan thu a sawi.

Phil hi nikum November thla khan cricket khelhna lamah ball in a nghawngah a per a, field chhungah nikhaw hre lova tlu zuiin ni hnih chhung hospital-ah enkawl a ni a, a harhchhuak zo ta lo a ni.

Kum 33-a upa Clarke chuan, "Hughes kha la damin kan zingah hian khel ve chu nise nuam a tih dawn tehlul nen. Tunah chuan kan champion-na a tana hlan hi kan tih theih tawk chu a ni," a ti.

Inkhelh laia an bana puan dum hren chhan chu sawifiahin Clarke chuan, "Hughes hriatreng nana ti ka ni a, ka thil hrenah hian a hming lamtawi 'PH' tih ka ziak a ni. A boralna vang khan Australia cricket chuan hun thim tak a tawk a, zanin kan hlim zanah hian kan unaupa kha kan hre reng a ni," a ti.

Clarke a chawl dawn ta

World Cup final zawhah Michael Clarke-a'n ODI a chawlhsan tur thu a puang a, Test match erawh a la khelh chhunzawm ang. Clarke hian Australia tana a ODI match hmasa ber 2003 khan khelin, Adelaide khawpuiah England a hmachhawn.

Clarke hian Australia tan ODI match 245 khel hmanin run 7,981-a score a, century vawi 8 lai hlapchhuak theiin a run siam hnem berah 130 a siam. Kum 2011-ah Australia captain-ah hlan kai a ni a, captain a nih chhungin ODI match 74 a khel hman a, vawi 50 tehmeuh a team a chakpui thei a ni.

Bowling lamah pawh Clarke a duai lo a, a ṭul hunah spin ball vawm tura hman a ni ṭhin. ODI bikah wicket 57 lai a la hman nghe nghe. Kumin World Cup-a Australia champion na tura player thawhhlawk ber pawl a ni.