Liverpool All Star Game

Pathianni zan khan Anfield-ah charity match buatsaih a ni a, Liverpool legend Steven Gerrard leh Jamie Carragher te'n an team tur an thlang ve ve a, inkhel hmuhnawm danglam tak an lantir.

Minute riatna lekah Liverpool tana khel mek Mario Balotelli chuan Carragher's XI tan a khung a, Chelsea striker Didier Drogba chuan minute 21-naah keeper Brad Jones thlenga bumin goal hnihna a khung leh bawk.

First half tawp hma minute riatah Jerome Sinclair-a hlawhchhuah chu Gerrard-a'n a khung a, 2-1 a ni. Second half tan ṭan dawn a, mipui an inpeih a, referee pawh an inring tawh mah se player pahnih an la kim lo. Liverpool fan-te lunglenna chawk tho turin jersey no. 7 leh jersey no. 9 kawr ha te chu koh luh an ni a, chumite chu tudang ni loin Luis Suarez leh Fernando Torres te an ni.

Uruguayan forward Suarez-a'n a ze ngai a chhuah a, Carragher lakah penalty a hlawhchhuak a, Barca forward hi charity match-ah pawh a tlu der duh leh tlat. Gerrard bawkin a pet a, a hlah lo. 2-2 in inkhel a tawp.

Charity match aṭanga sum hmuh hi Liverpool FC Foundation, Alder Hey Children's Hospital leh Liverpool khaw chhunga mirethei ṭanpui ṭhin pawl te hnenah sem darh a ni ang.