Schumacher hnung zuitu Vettel

German driver Sebastian Vettel chuan a hnampui Michael Schumacher hnung zuiin Ferrari car khalh chung ngeiin Formula one intlansiakah pakhatna a ni ve ta.

Pathianni khan Malaysian Grand Prix-ah Vettel hi Mercedes driver Lewis Hamilton aia chaka tlanin Ferrari car hmanga a intlansiak vawihnihna lekah pakhatna a ni thei nghal a ni.

Kum 2000 aṭanga 2004 chhung khan Schumacher hi Ferrari car khalh chungin World Champion vawi nga a lo ni tawh. Vettel ve thung hi chu Red Bull car khalh chungin 2010 aṭanga 2013 chhung khan World Champion vawi li a lo ni tawh a, tun season aṭangin a naupan lai aṭanga a lo ngaihsan em em Schumacher hnungzuiin Ferrari car a khalh ta a ni.

Ferrari driver Vettel chuan, "Tunah chuan ka lo suangtuah ṭhin ang kha a thleng dik ṭan ta, Schumacher hi ka ngaisang em em a amah ang nih hi ka chak ṭhin. Mercedes hian nikum aṭang tawh khan intlansiak hi an thunun hneh hle a, mahse tunah chuan kan hun a thleng ve dawn tain ka hria. Tun hi a tawpna ala ni dawn lo a Champion ngei tumin kan bei dawn a ni," tiin a sawi.

Sawi chhunzawmin Vettel chuan, "Ferrari team hi nikum lamah an che ṭha tawk lo tih chu kan hre vek awm e, mahse team hlun leh ropui an nih avangin rinna ka nghat a, an tho leh ngei dawn tih ka hriat avangin ka zawm reng a ni," tiin a sawi.