Portugal-in Euro 2016 an hnaih zel

Portugal in Euro 2016 khelh an tumna an chhawm nung zel a, Group I ah hmahruaitu nih chhunzawm zelin Pathianni zan khan Serbia chu 2-1 in an hneh.

Benfica stadium Estadio da Luz-a inkhelah hian Portugal tan defender pahnih Ricardo Carvalho leh Fabio Coentrao te chuan goal an khung a ni.

Inkhel an ṭan a, inkhel ṭan tir phat aṭangin Portugal in an mikhual an ngam zawk a, goal thun ngei tumin an nawr. Portuguese fan te'n an goal hmasa ber an nghak rei lo, minute sawm a liam hman awrh tihin kum 36-a upa Carvalho chuan a la upa lo tih tilangin Fabio Coentrao ball cross ṭha tak chu a lo tauh goal a, Serbia in an defending chhiat an tuar. Goal a khung aṭanga minute sarih na lekah Chelsea leh Real Madrid defender hlui hi hliam vangin lakchhuah a ni.

Portugal in an nawr chhunzawm a, Serbia defender ho an talbuai. Cristiano Ronaldo leh a ho te'n vawi tam Serbia tlarhnung an rum ṭhaih a, a pawimawh ber goal erawh an khung chhunzawm thei lo. Goal khatin Portugal in hma an hruai a, chawlhlawk an hmang.

Second half an ṭan a, first half ang tho in inkhel a danglam lo a, Portugal bawkin inkhel an thunun. Minute 52 naah Serbia striker Alek­sandar Mitrovic chuan ho takin goal a khung lo a. Mahse minute riat hnu lawkah Serbia in goal an khung ta nge nge, goal khungtu hi Chelsea midfielder Nemanja Matic a ni. Matic hian Rado­sav Petrovic ball tauh chu bicycle kick-in mawi takin goal-ah a lo chan tir a ni. Matic hi a offside niin lang mah se, referee berin a ham tlat lo.

Mahse, Serbia an lawm rei lo a, an goal khung aṭanga minute hnihna lekah Real Madrid left back Coentrao chuan khel ṭha em em mai Joao Moutinho ball pek duhthusam chu goal-ah lo chan tirin Portugal chu 2-1 in an chak ta a ni.

Ronaldo leh a ho te tan qualifying match thum chhung a zawna an chakna a ni ta.