Turin-ah England leh Italy inkhel dawn
Zanin dar 1:15 hian Turin-ah Italy-in England an mikhual dawn a, friendly match ni mah se ram lian pahnih inkhel tur hian ngaihven a hlawh hle.
2014 World Cup-ah Italy leh England hi group khatah an awm a, second round lut tura rinkai ve ve ni mah se Group D aṭanga team tlang chu Uruguay leh Costa Rica an ni daih. World Cup-a mualpho, inelna lian zawh hnua che ṭha ve ve an ni.
Zirtawpni zanah England-in Lithuania 4-0 in an sawp a, Italy an hmachhawn hunah man of the match Danny Welbeck bakah Raheem Sterling, James Milner leh Leighton Baines te inhliam vangin an khel thei dawn lo.
England manager Roy Hodgson chuan, "Italy-a zin thei lo tur player pali kan nei a, a ṭha zawnga thlir chuan player dang tan chance ṭha a inhawng dawn tihna a ni. Left back khel thiam player pahnih kan mamawh a, Kieran Gibbs (Arsenal) kan nei sa a, Saints defender Ryan Bertrand kan koh belh bawk," tiin team dinhmun a sawi.
England team hi Premier League club lian player-te fuan khawmna a ni bik tawh lo a, club hrang hrangin player an thawh. Lithuania an hneh ṭuma England midfield-a player ṭangkai Fabian Delph chuan, "Wayne hi captain ṭha tak a ni a, field pawn leh chhungah a entawntlak hle a ni. A hnuaia khelh hi a nuam a, ram tana theihtawp chhuah zel ka duh a ni," tiin ram tana vawi li khel tawh chuan a sawi.
Ram tana goal 47 khung tawh Rooney chuan World Cup zawh hnua an insiamṭhat thu a sawi a, England captain chuan, "Kan khingpuite hian nuamsain min hmachhawn tawh lo ang. World Cup khelh zawh hnu khan team ṭha zawk kan din a, kan theihna zawng zawng kan chhuah ṭhin. Eng team mahin kan team hi an palzam thei lo ang," tiin an ṭhat tawh thu a sawi.
Manchester forward chuan sawi chhunzawmin, "Italy hi team ṭha tak a ni a, minute 90 chhung chuan an chungnung zawk chang pawh a awm ang. Kan tih tur chu a hunah tak kan nawr let thiam a ṭul a ni," tiin a sawi.
Italy hian World Cup zawhah coach thar an nei a, Antonio Conte hnuaiah harhtharna an chang mek. Amaherawhchu fan ṭhenkhatin a training dan fuh tawk loh vangin thahah an vau, Juve manager hlui Claudio Marchisio inhliam chhanah an puh. Inkhelhna tur hmun hi Juventus stadium a ni a, Italian boss tan Serie A hmahruaitu supporter hmachhawn a châkawm loh khawp ang.
Italian Football Federation president Carlo Tavecchio chuan, "Conte hi ka hmu a, ṭum dang angin a dam dup lo. A hlauthawng a ni. Supporter hian a ṭha lo zawnga kan team enkawltute an beih chuan kan ram fotoball team-in a tlakchhiah phah ang," tiin supporter-te a dem thu a sawi.
Inkhel tur chungchang sawiin Conte chuan, "Friendly match pawimawh tak a ni a, player enchhinna hun atan kan hmang ang," a ti.
Khawvel mipui ngaihven erawh Italian player-te an ni lo a, England forward Harry Kane a ni. Spurs striker hi Danny Welbeck inhliam vangin starting eleven a chan rin a ni a, record siam thei dinhmuna ding Rooney aiin Kane-a chanchin hian ngaihven a hlawh zawk.
World Cup zawha England Results
Date Khingpui Score
3 September Norway (H) 1-0
8 September Switzerland (A) 2-0
9 October San Marino (H) 5-0
12 October Estonia (A) 1-0
15 November Slovenia (H) 3-1
18 November Scotland (A) 3-1
27 March Lithuania (H) 4-0