Andy Murray a chak, Nadal a chak lo

Miami open-ah British Andy Murray chuan a khingpui Co­lombian Santiago Giraldo hnehin last 16 a in vawtling a, Rafael Nadal erawh Fernando Verdasco hneh loin a tla.

Third round-ah hian Murray hian harsatna a tawk lem lo a, 6-3, 6-4 in harsa lo takin a chak thei a ni. Nadal erawh beisei a phak lo a 6-4, 2-6, 6-3 in Verdasco a hneh lo. Inkhel dangah Gael Monfils chuan Jo-Wilfried Tsonga chu 6-4, 7-6 (4) in a hneh.

World number 3 Murray hian tennis a khel tawh aṭangin match 499 a chakna chiah a ni a, last 16-ah Kevin Anderson a hneh leh a nih chuan mellung pawimawh tak a phum thei dawn a ni. Tennis khel zingah vawi 500 chak tling thei hi mi 46 chauh an la awm.

Kum 27-a upa Murray chuan, "Ka chak hi ka lawm, match 500 chak thei nih ve hi ka chak a, ka tum a ni bawk. Last 16-ah hian ka thleng thei lo palh a nih pawhin nidangah ka la bei leh zel tho ang," tiin a sawi.

Hmeichhe lamah Serena Williams chuan minute 41 chhung lekin Catherine Carta Bellis chu 6-1, 6-1 in a sawp a ni. Angelique Kerber chu Svetlana Kuznetsova lakah 3-6, 6-3, 3-6 in a tawm thung.