Scotland damna Fletcher-a hat-trick

Pathianni zan khan Euro 2016 qualifying khelh chhunzawm leh a ni a, Scotland chuan Steven Fletcher-a goal thum khung hmangin Gibraltar 6-1 in an sawp. Lee Casciaro chuan Gibraltar tana a goal hmasa ber a khung.

Scotland leh Gibraltar inkhelah hian goal a lut tam hle a, Shaun Maloney chuan penalty aṭangin minute 18 leh 34-ah goal a thun a, Sunderland striker Steven Fletcher chuan minute 29, 77 leh 90-ah te goal a khung bakah Steven Naismith chuan goal khat a khung ve bawk. Gibraltar goal neih chhun hi minute 19-naa striker Lee Casciaro thun a ni.

Scotland tan a game khat a goal thum khung thei hi an awm zen zen lo a, kum 1969 khan Colin Stein-a'n a lo khung tawh. Kum 46 hnuah Stein-a thil tih theih ang hi Fletcher-a'n a rawn ti thei ve leh chauh a ni. Kum 2006-a Faroe Islands 6-0 a an sawp hnua an chak lehna nasa ber a ni.

Hampden Park-a inkhelah hian Gibraltar hi chak lo chiang viau mah se an tan chuan an goal khat thun hi a hlu hle a.

Casciaro goal thun hi international level com­petitive match a an ram goal khung hmasa ber a ni.

Gibraltar hi Medi­terranean tuipui a thiarkar te takte a ni a, mipui 30000 bawr vel chauh an awm. He inkhelah hian fans 500 bawr vel chuan an ram inkhel hi an ṭawiawm ve a ni.

FIFA 2014 World Cup champion Germany in minute nga chhung lekin goal hnih an khung thei a, an khingpui Georgia chu 2-0 in an hneh. Germany tan hian Marco Reus leh Thomas Mueller te chuan goal khat ve ve an khung.

Germany goalkeeper Manuel Neuer chuan, "Tunah chuan kan khel ṭha leh ta, mahse duhthusam erawh a la ni lo. Hmasawnna tur kan la ngah hle, engpawhnise Euro chu kan khel turin kan in hlan kai theih ngei ka ring," a ti.

Group D inkhel dangah Poland tan a minute 26-naa Slawomir Peszko goal thun chu hun tawp hma chiah minute 90-ah Republic of Ireland tan Shane Long chuan a sut a, 1-1 in an inhnehtawk.

Euro 2016 France a khelh turah hian quali­fying group D aṭang hian inhlangkai tur rinthiam a harsa rih hle a, match nga khelh tawhaṭangin Germany, Scotland leh Poland ten point 10 ṭheuh an hmu tawh a, match nga khelh tur an la nei. A sang pahnihin direct in France an pan thei anga, pathumna chuan play-off an khelh a ngai dawn a ni.