Newcastle hi ka ngaidam ngai lo ang - Gutierrez

Argentine midfielder Jonas Gutierrez chuan kap bawr cancer vanga hun engemaw chen a kulcho laia a club khelhna Newcastle United in an ngaihtuah tawk loh vanga a vui thu sawiin a ngaihdam ngai loh tur thu a sawi.

Kum 31-a upa Gutierrez chuan, "Cancer vangin zai ka nih zawh hnu December thla lai hawlah ka lo kir leh a, December thla lai hawl ka thlen meuh chuan Newcastle coach in kan vaia ṭhat tlan zawk nan club dang khelhna zawng turin min lo hrilh a ni. Club tana ṭha tur an ngaihtuah tih ka hria a, mahse kha aia chiang zawk khan thil an ngaihtuah tur a ni. He club tan hian cancer natna in min tihbuai hma khan kum nga chhung ka theihna zawng zawng nen ka lo khel tawh ṭhin a, chu chu min hriatsak ve ka lo beisei a ni," a ti.

Argentina tan pawha lo khel tawh ṭhin Gutierrez chuan, "Min enkawl dan zawng zawng kha ka ngaihtuah let hian hriatthiam har ka ti takzet a ni. Team khan player dam ṭha an mamawh tih ka hria a, mahse khatiang ang hun tawn hrehawmah kha chuan min ngaihsak ve deuh kha club chuan a tih tur a ni," a ti.

February-a first team tana khel leh tawh Gutierrez chuan a inenkawlna senso zawng zawng pawh aman a in tum vek thu sawiin, club chuan sum an thehchhuah sak miah lo niin a sawi bawk.

Newcastle-a kum sarih a cham chhunga match 200 dawn khel tawh Gutierrez hi tun nipuiah hian Newcastle-a a contract a tawp tawh dawn nghe nghe.