Hamilton dan theih a ni lo - Bottas

Valtteri Bottas chuan amah ang bawka Merce-des car khalhtu Lewis Hamilton chu driver ṭha bik a nih thu a sawi a, world champion nih a tumna kawngah a teammate dang tur chuan thil mak a thlen a ngaih hial thu a sawi.

Season kal laiah Mercedes driver pahnih hi an chungnung viau, hmahruaitu Hamilton-a'n point 190 ngawt a hmu tawh, pahnihna dinhmun luahtu Bottas chuan point 135 a nei thung.

Bottas chuan, "Lewis nen kan inkara point awm hi a tam tawh hle, tih zim mai bakah tlan pelh theih chu a la ni tehmeuh mai. Amaherawhchu a chung zawka ka awmna tur chuan thil mak a thlen a ngai tawh hial ang," tiin a sawi.

Britain tlangval Hamilton hian F1 huanga hnehna chan tam lamah Michael Schumacher (91 chak) a nihrual tawh a, kuminah hian a champion a nih chuan world title lak hnem lamah pawh German legend hi nihrualin, nomawi vawi sarih a chawina tur a ni ang.

Kum 35 mi Hamilton hi a kum tam deuh tawh mah se vanglai a la hmang mek, tun hnaiah amah elphak an awm meuh lo. Car intlansiakna sang berah hian mimal record ṭha hrang hrang a siam chho zel a nih pawhin a mak lo ang.