Aizawl FC pawh an chak chiang
I League second division-ah Mizoram Premier League club te'n result ṭha an nei zel. Chanmari FC-in Kenkre FC 4-1 a an hneh hnuah nimin khan Aizawl FC-in 4-1 bawkin Lonestar Kashmir FC te an sawp.
Tute nge inlan?
Aizawl FC-in foreigner pathum an nei a, pahnih chiah chhawr theih a nih avangin MPL3-a kan hmuh ṭhan Justice Morgan aiin tlar hmaa mal tlat turin player thar Alfred an ring zawk.
Goalkeeper-ah Zothanmawia a awm a, defence-ah Immanuel HS Lalṭhazuala, Emmanuel Chigozie, Lalramchhullova leh
Lalrozama Fanai te an intlar a. Midfield-ah tawnhriat ngah pathum Rohmingthanga, Reuben Zosangpuia leh captain David Lalrinmuana te an awm a, wing-ah Zormthara leh Brandon VL Remdika te an awm thung.
Bul ṭan fuh lo
Kanchenchunga Stadium-a inkhelah Aizawl FC aiin Lonestar-in bul an ṭan fuh zawk a, keeper T. Mawia chet ṭhat zarah goal an chhuah lo.
Darkar chanve hnuah ding lam aṭanga Thara cross chu Liberian forward Alfred-a tihbuai vangin Lonestar defender Rahul-a'n an lamah ti lut.
Goal khat luh hnuah Aizawl FC an che ṭha a, first half tawp hma hretin Alfred-a pass ṭha zet chu Thara'n cool takin a khung a, 2-0 a ni.
Halftime-a zilhna ṭha dawng Aizawl FC te second half-ah an khel ṭha lehzual a, ṭan aṭanga rei loteah Alfred-a'n a penalty hlawhchhuah goal-ah chantir lo mah se darkar chanve pelh hretah captain David-a'n yard 20 aṭangin freekick aṭangin a khung tho.
Minute 78-naah Lonestar tan Cristopher-a'n goal khat a khung a, amaherawhchu inkhel thuntu Aizawl FC tan a harsat phah lo. Hun tawp hma hretin substitute Lalbiakthanga'n goal khat dang a khung belh a, amah ang bawka substitute Justice Morgan-a thawrhah a ni. BT-a goal khung hnuah hun a tawp zui a, Aizawl FC 4-1 in an chak.
Eng nge an sawi?
Aizawl FC coach K. Malsawmkima chuan, "Bul kan ṭan fuh lo a, mah se ground ball kan khelh ngam hnuah kha chuan inkhel kan thunun khawpin ka hria. Kan khelh dan pawh a lungawi thlak e," tiin a sawi.
Mala chuan sawi zelin, "Team hrang hrang inkhel kan en tawh a, Mohammedan SC inkhel pawh kan thlir a, an danglamna bik vak ka hmu lo. Hneh theih an ni tih ka hmu a, Chanmari FC bawk hi kan elpui tur niin ka hria. MPL club tan I League a beisei ngamin ka hria," tiin I League khelh phak ngei an tum thu a sawi.
Aizawl FC technical director Hmingthansanga chuan, "Kan lawm khawp mai. I League second division-a vawi thum kan tel tawhah khan match hmasa berah chak kan la nei lo a, tun hi kan vawi khat chakna a ni. Tun dinhmunah chuan team tinte kan intluk tawk viauin ka hria a, vawi thum kan inkhelh kual hnu chuan team ṭha tur chu a chiang tawh ang," tiin team dinhmun dik tak hriatthiam a har thu a sawi.
Hmingthana chuan sawi chhunawmin, "Kan result ngaihventu an awm hi kan lawm a. Club lama kan hotute, MFA hruaitute, local football ngainatute leh min ṭawngṭai saktute chungah kan lawm tak meuh meuh a ni," tiin a sawi.
I League second division-ah hian team riat an awm a, vawi hnih ṭheuh an khelh kual hnua sang berin season tharah I league an khel dawn. Pathianni tlai khan Mohammedan SC-in Phulchand leh Daniel Bidemi te goal hmangin United Sports 2-0 in an hneh a, Kolkata club pahnih hi tling tura rinkai zingah an tel.
Fixtures
ROUND 2 : April 1, Nilaini
9:30 AM Kenkre Sports Vs Aizawl FC
3:15 PM Hindustan FC Vs Chanmari FC
ROUND 2 : April 2, Ningani
9:30 AM Mohammedan Sporting Vs Lonestar Kashmir FC
3:15 PM PIFA Sports Vs United Sports Club