Brazil leh Chile danglamna Lammuala ball pet tawh Firmino

Pathianni zan khan Emirates Stadium-ah Roberto Firmino goal hmangin Brazil-in friendly match-ah Chile an hneh.

2014 World Cup last 16 rematch-ah inkhel entu an ṭhahnem a, Arsenal khelmualah mipui 60,000 zet an pungkhawm. World Cup-a Germany laka mualpho Brazil team kha an ni tawh lo a, Dunga enkawlna hnuaiah nasa taka player thlak danglam a ni. Arsenal defender Gabriel Paulista pawh a vawi khatna atan ram tana khel tura koh niin bench-ah a ṭhu thung.

First half-ah Chile star Alexis Sanchez leh Brazil captain Neymar te'n goal an khung teuh ve ve a, goal hmuh tur erawh a awm lo.

Arsenal tan tun sea­son-a goal 17 khung tawh Sanchez-a Chile tan a che ṭha a, ram tan vawi 27 khung tawh mah se Emirates Stadium-ah goal a khung thei tlat lo.

Minute 75-naah goal kan hmu a, Danilo pass chu Firmino chuan Chile keeper Claudio Bravo bum nana hmangin Brazil chakna goal a khung. Hoffenheim playmaker hi Lammuala mipui lawm hlawh tak kha a ni.

World Cup-a pathum­na inchuhnaah Brazil-in Netherlands an hneh lo a, manager Luiz Felipe Scolari bang zuiin a aiah Dunga ruat a ni. 1998 World Cup-a Brazil champion puitu captain hnuaiah Brazil a zawnin vawi riat an chak tawh.

Dunga chuan, "World Cup-a kan chak loh hnua player-te khelh leh danah hian ka lawm khawp mai. An thawkrim a, result ṭha lo theihngilhin mawhphurna an la thiam hle," tiin a player-te a fak.

South America ramte inelna Copa America chu June thla hian khelh ṭan a ni dawn a, June 14 khian Brazil-in an match hmasa berah Peru an hmachhawn ang. Hemi chungchang hi sawiin Dunga chuan, "Copa America hi ṭum dang aiin a harsa dawn. South America player ṭhahnem tak Europe club tan an khel a, nasa takin ram tinin hmasawnna an nei vek a ni," tiin a sawi.