Rossi a la tar lo; Qatar-ah a tlan chak ber

Pathianni khan MotoGP 2015 season chu Qatar-ah tlan ṭan a ni leh ta a, Italian Valentino Rossi chu tuma umphak lohin pakhatna a ni.

Yamaha rider Rossi hi World champion vawi sarih a lo ni tawh a, tun ṭum hi intlansiak vawi 109-a pakhatna a nihna chiah a ni nghe nghe. Kum 2010 hnua season ṭanna intlansiak hmasa bera pakhatna a nih lehna hmasa ber a tawng leh ta. Rossi hian pariatna aṭangin intlansiak bul ṭan mah se a thiamna leh tawnhriat neih tam tawh chu chhawr ṭangkaiin hnehna a chang thei tho a ni.

Qatar-ah hian Yamaha leh Ducati an che ṭha hle a, Ducati rider Andrea Dovizioso chu pahnihna niin a team-mate Andrea Iannone chu pathumna a ni a, Yamaha rider Jorge Lorenzo chu palina a ni bawk.

World champion nilai Honda rider Marc Mar­quez-a'n intlansiak hmasa berah beisei a pha lo a, season hmasa intlansiak hmasa 10 ah chak vek mah se kuminah erawh palina a ni pha chauh.

Qualifying a tlan ṭha, Pole position aṭanga bul ṭan thei Dovizioso hi pakhatna ni ngei tur a beisei ni mah se tawnhriat ngah tawk tak Rosssi chu 0.174 seconds in a umpha lo a ni.

Nikum Qatar intlansiaka pakhatna lo ni tawh Marquez hian beiseina sangtak nen intlansiak bul ṭan mah se kawng kawi hmasa berah che sual deuhin a hnungtawlh phah a, theihtawp chhuah in um leh mah se a tawp thlengin a hnufual chhunzawm phah ta a ni.

Kum 36-a upa Rossi chuan, "Qatar a hnehna ka chang thei hi ka tan chuan a hlu bik hle a ni. Kan bike a ṭha takzet a, a lawmawm khawp mai. Kan elpui Honda leh Ducati te hi team ṭha leh hlauhawm tak an ni a, kan inthlahdah a thiang lo ang. Vawiin a kan chakna hi kei leh ka team Yamaha tan a hlu hle a ni, a chhan chu test-ah duh angin kan tlan ṭha tawk lo a, mahse intlansiak tak takah chuan ka tawnhriat ngah tawh ka chhawr thei hlauh," tiin a sawi.

Yamaha team principal Lin Jarvis chuan, "Rossi kha a tlan ṭha takzet, vawiin kha a tlan ṭhat ber ṭum ala ni hial ang. Pariatna aṭanga bul ṭan chung si a pakhatna a hauh thei kha a turu hle a ni," tiin a sawi.

Pahnihna kum 29-a upa Dovizioso chuan, "Last lap-ah khan lehpelh ngei tumin ka theih tawp tak meuh meuh ka chhuah a, mahse khatiang hun harsaah tawh kha chuan Rossi lehpelh kha thil harsa tak a ni tawh. Engpawhnise, pahnihna nih hi season bul ṭan na ṭha tak a ni," tiin a sawi.

Qatar MotoGP result

1. Valentino Rossi (Ita) Yamaha

2. Andrea Dovizioso (Ita) Ducati

3. Andrea Iannone (Ita) Ducati

4. Jorge Lorenzo (Spa) Yamaha

5. Marc Marquez (Spa) Honda

6. Dani Pedrosa (Spa) Honda

7. Cal Crutchlow (GB) Honda

8. Bradley Smith (GB) Yamaha

9. Pol Espargaro (Spa) Yamaha

10. Yonny Hernandez (Col) Ducati