Medvedev hnehin Sinner a tlang

Jannik Sinner chuan world number 1 a nihna chu a takin a lantir - Italian tlangval hian US Open nomawi chawi a tumna kawnga a khingpui hautak ber tura ngaih Daniil Medvedev hnehin semifinal a invawkai.

Nimin zing quarterfinal inkhel hmuhnawm takah Sinner hian darkar hnih leh minute 39 chhungin 6-2, 1-6, 6-1, 6-4 in a hneh a, semifinal-ah chuan inelna neih laia khel ṭha tluang tak mai Jack Draper a hmachhawn leh ang.

US Open 2024 mipa singles semifinal lut zingah Sinner chauh hi Grand Slam champion tawh a ni a, inelna lian leh boruak sang a zo tih a chiang, a thiam pali zingah hian tunah chuan a buk rit ber a ni chhunzawm dawn a ni.

Medvedev a tla

New York khawpuia stadium hmingthang, khawvel huapa tennis stadium lian ber ni bawk Arthur Ashe Stadium-ah Sinner leh Medvedev te hi chak zawk tur rinthiam an harsa, tun hma lam an sulhnu en chuan Medvedev-a'n tawnhriat a nei ṭha zawk.

Player ṭha tak ni mah se, nidang an khelh ṭhat leh ropuina ang tak erawh an lantir hleithei lo. Medvedev phei chuan double fault vawi ruk a nei a, vawi 57 tehmeuh unforced error a nei bawk, ama tihsual avanga a khingpui point hmuh a tam tham takzet a ni.

Russian star Medvedev hian US Open 2019 nomawi kha a chawi a, season hmasa khan Flushing Meadows-ah hian final a lut bawk, tun ṭumah chuan a vanduai zawkah a ṭang, tun season Grand Slam an intawn tawhna hmasa pahnih an phak lo ve ve thung.

Medvedev hian tun hma chuan Sinner nen an intawn hmasa parukah hnehna a chang vek a, tunah chuan thil a danglam chho ta hle - Italian tlangval Sinner hi vawi ruk a chak ve tawh a, Medvedev chak tamna chu match khat chauh a ni tawh.

Sinner a nghet

Australian Open 2024 nomawi a chawi a, hnuah Grand Slam title la lak belh leh lo mah se a thleng sang ṭhin a, inelna dangah a che ṭha ṭhin bawk - player ṭha rual tam tak zingah world number 1 nihna a chelh thei reng a, hei hian a ṭha tawk tih a fiah.

Kum 23 mi Sinner chuan, "Daniil Medvedev nen hian kan inhrechiang em em a, tennis court pawn lamah pawh ṭhian ṭha tak kan ni. Kan inhriatchian avangin kan ṭhatna leh ṭhat tawk lohna lai pawh kan inhre tawn, chuvangin inhmachhawn hi a harsa ṭhin.

"A bik takin set hmasa pahnih kha a harsa hle, service hloh zeuh kha chuan na taka tawrh chhunzawm nghal a ni mai. Hmasawnna tur lai erawh ka la ngah, kan inkhel hi ka enlet ang a, chutah chuan ka ṭhat tawk lohna laite siamṭhat ka tum ang," a ti.

Tun season chhungin Sinner hian hard court bikah chak lohna match pahnih chiah a la nei, a dangah chuan chak fai vekin nomawi pali a chawi tawh. Damdawi hman phal loh chungchangah buaina nei ve zauh mah se, khelmual chhungah a nghawng rih lo tih a lang.

Hmabak Draper

Sinner hmabak chu Jack Draper a ni dawn - British tlangval hi seeded 25-na daih ni mah se, tun tournament chhungin match vawi nga a khelh tawh chinah set a la hloh miah lo, set hloh loa semifinal lut thei awmchhun a ni hial.

Kum 22 mi Draper hian quarterfinal-ah amah aia ranking sang zawk, seeded 10-an Alex de Minaur chu 6-3, 7-5, 6-2 in a hneh. Season tir lamah hliam vangin buai ve deuh mah se, a hliam a dam ṭhat meuh chuan dan theih loh ang maiin a kal fawr.

Britain tlangval zingah chuan Andy Murray (2012) hnuah Draper hi US Open semifinal thleng leh thei hmasa ber a ni. Beisei a neih thu sawiin Draper chuan, "Khawvela tennis court lian bera inkhelh hi ka suangtuah ve ṭhin a, tunah chuan a takin a lo thleng dik.

"Inrintawkna sang tak nen inelna ka hmachhawn theih avangin ka hmaa ding hi ka huphurh ngai lo. Tu pawh hmachhawn dawn ila nuamti takin ka khel tawp mai dawn a ni, kei chuan hlauh tur ka nei lo," tiin a inringtawk hle.