Pegula lakah number 1 Swiatek a chak lo

Hmeichhe tennis world number 1 Iga Swiatek chu Jessica Pegula hneh loin US Open quarterfinal-ah a tla, hnehna changtu Pegula hian a vawi khat nan Grand Slam semifinal a khel dawn.

Nimin zing Arthur Ashe Stadium-a inkhelah Pegula a talbuai lo, darkar khat leh minute 28 chhung lekin Swiatek hi 6-2, 6-4 in a hneh a, final lut tur chuan Karolina Muchova a paltlang leh a ngai dawn a ni.

American nula Pegula hian tun hmain Grand Slam pali - Australian Open, French Open, Wimbledon-ah te quarterfinal a thleng vek tawh, mahse a vanduai zawkah a ṭang ṭhin, tun ṭumah erawh hun rei tak a nghah chu a takin a lo thleng ve ta.

Kum 30 mi Pegula chuan, "Ka nghak a, hun rei tak chhung chu ka nghak, vawi ruk ngawt mai quarterfinal-ah hian a vanduai zawk ka ni tawh ṭhin, tunah chuan Pathian hruaina in semifinal ka sawi ve thei ta, chumi piah lamah chuan tun dinhmuna khawvela player ṭha ber ka hneh bawk.

"Iga-i hi chu a thiamin a huaisen em em a, a bik takin Grand Slam match hoah chuan hmachhawn châkawm lo leh harsa tak a ni, ka paltlang theih avangin inrintawkna pawh sang tak ka neih belh theih phah a ni," tiin a sawi.

Grand Slam vawi nga champion tawh Swiatek khelh ṭhat ṭum a ni lo, unforced errors vawi 41 ngawt mai a nei a, ama tihsual vanga a khingpui in point a hmuh phah hi a tam tham hle.

Polish nula Swiatek hi kum 23 mi chauh la ni mah se nomawi lian a chawi tam tawh a, chutihrualin hard court leh grass-a inkhelh a harsat deuh ṭhin - US Open 2022 champion a ni tawh thung a, a khelh thiam tawk lohna hmunah pawh a hlauhawm, kuminah erawh a tum ram a thleng zo ta bik lo.

Hmeichhe singles quarterfinal dangah Karolina Muchova chuan Beatriz Haddad Maia lakah 6-1, 6-4 in hnehna a chang ve thung a, a service ṭha leh ball vuak na tak chu a chak theih chhan langsar leh pawimawh a ni.

A kum zawna US Open semifinal lut thei Muchova chuan, "Inkhel awlsam tak a ni lo, inkhelh laklawh laiin toilet lama ka kal te a ngai leh rih a, chutiang chunga hnehna ka chang thei hi a hlut dan a danghlam hle.

"Inkhel entu leh ka khingpui ngei pawh ka tibuai tih ka hria, mahse ka duhthlanna piah lam thil a nih avangin min hriatthiam pawh ka beisei," a ti. Set hnihna an khelh laiin enkawl lailawk a ngai a ni.