Ballon d'Or dawng thei tur chhawp chhuak

Football huanga mimal chawimawina ngaihhlut ber Ballon d'Or dawng thei tur player 30 chhawp chhuah an ni a, kum dang zawng aiin tun ṭumah hian a dawng tur hriatthiam a harsa dawn niin a lang.

Euro 2024 khelh zawh taka England aiawhtu player paruk ngawt an lang - striker Harry Kane, midfielder Jude Bellingham, Phil Foden leh Declan Rice te bakah forward Bukayo Saka leh Cole Palmer te an lang a ni.

July thla maia kum 17 tling hlim Lamine Yamal hming pawh a lang - Spain international hian Euro 2024 nomawi a chawi a, a club Barcelona tan nomawi chawi lo mah se ram tana a chet dan avangin vote a hmu nualin a rinawm.

Inter Milan striker ṭha Lautaro Martinez pawh a buk rit zinga mi a nih a rinawm - Italian football inelna sang ber Serie A-ah a team a champion pui, hei bakah hian Argentina chu Copa America nomawi a chawipui bawk a ni.

Ballon d'Or vawi riat ngawt mai dawng tawhtu Lionel Messi hming a lang lo thung a, ani bakah hian mimal chawimawina lian vawi nga dawng tawh Cristiano Ronaldo hming hmuh tur a awm lo bawk.

Messi leh Ronaldo te hian Ballon d'Or hi an awp hneh thei hle, kum 2003 chinah player ropui pahnih te tel loa Ballon d'Or dawng thei tur chhawp chhuah a nih vawi khatna a ni a, a lunglen thlak zawnga ngaihtuah pawh an awm ngei ang.

Ballon d'Or lo dawng tawh zingah Karim Benzema leh Luka Modric te hming hmuh tur a awm lo bawk, anni pahnih hian inkhelh la chawlhsan chiah lo mah se an vanglai a liam tawh a, mimal chawimawina dawng thei tur zinga lang tur an ni tawh lo.

Ballon d'Or 2024 hi kum 2023 August 1 aṭanga kum 2024 July thla inkara an chet dan aṭanga teh tur a ni dawn. October 28, Thawhṭanni hian Paris khawpuiah lawmman dawng tur hi puan a ni ang.