Number 1 hlui Kerber a tla

French Open-ah Thawhṭanni zan khan Serena Williams leh Garbine Muguruza ten fiahna an paltlang laiin Angelique Kerber erawh a chak lo, world number 1 hlui Kerber hi a match hmasa berah Kaja Juvan lakah 6-3, 6-3 in a tlawm.

German nula Kerber hian Paris khawpuiah hian result ṭha a nei ngai meuh lo, 2012 leh 2018 khan quarterfinal a lut tih bakh chu a thleng sang ngai lo. Kar hmasa khan Italian Open-ah hneh nei loin a tla tawh bawk, atan clay court hi hmun ṭha a nei ve lo.

Kum 32 mi Kerber-i'n darkar khat leh minute sarih chhungin unforced error vawi 30 zet a nei hman a, a service vawi nga a hloh bawk avangin a tlawm zawkah a ṭan a ngai - tun season chhungin beisei ang result a hlawh chhuak thei lo a ni.

Inkhel dangah Serena Williams erawhin set hmasa bera harsatna tawk ve deuh mah se Kristie Ahn chu 7-6 (7-3), 6-0 in a hneh, set khatna la turin darkar khat leh minute 14 a mamawh laiin, set hnuhnung zawk erawh minute 27 chhung lekin a la fel.

Serena hian Inrinni khan kum 39 a tling tawh a, a vanglai pel tawh mah se player dang tana hmachhawn châkawm loh ber zinga mi a la ni reng. Second round-ah chuan Tsvetana Pironkova nen an inhmachhawn leh ang.

Grand Slam vawi 23 champion tawh Serena chuan, "Ka khelh dan kha duhthusam chu a ni vek lo mai thei, ka tan erawh hnehna chan nan a tawk," a ti. Serena hian major title la hnem ber Margaret Court (24 titles) nih rual turin vawi khat champion chauh a hmabak tawh.

Kum 33 mi Pironkova-i'n fa a neih hnuah tennis a khel ve leh ṭan a, US Open-ah khan duhsak taka wildcard pek niin quarterfinal a thleng hial. Mahse New York khawpuia inelnaah hian Serena a ngam lo, tournament lianah a zawnin an intawng dawn.

French Open champion hlui Muguruza chu nuamsa takin a tlang mai bik lo. Spanish star hian a match hmasa berah Tamara Zidansek chu 7-5, 4-6, 8-6 in a hneh hram a, seeded 11-na hian a match lehpeka a hmachhawn tur Kristyna Pliskova paltlang tur chuan hmasawn a mamawh ang.