Mittui nena international football thlahtu Suarez

Luis Suarez tih hi chuan, Liverpool-a a duhthala Premier League defender ṭha a chaih lai te, Barcelona-a Lionel Messi leh Neymar te nena an inkawp hmuhnawm lutukte kha - mitthlaah a lo lang leh chuai chuai ṭhin.

Major League Soccer-ah a ṭhian kawmngeih em em Messi nen intawng lehin, US football-ah an hun tawp lam an hmang mek a, kum 37 lai a lo nih ve tak bawk avangin club football leh international football kara then kual reng turin a taksain a tlin ta lo tih a hai lo.

Uruguayan footballer ropui sawi a nih pianga lam hmaih ni tawh ngai lo tur Suarez chuan international football a mangṭha ta a, mittui nen an ram jersey chu a thlah ve ta - aw hun, khuarei i chang mai tur hi chu aw!

Suarez chuan, "Uluk takin ka ngaihtuahna ka seng a, tun hi thutlukna siam hun tur tak niin ka hria a ni," a ti a, September 7, Inrinni zing dar 5:00-ah Paraguay hmachhawnin World Cup qualifier an khel ang a, kumkhua atan Uruguay jersey chu a hlip tawh ang.

Naupang paukhauh

Uruguay-a khawpui pakhat Salto an tihah chuan January 24, 1987 khan naupang danglam bik a piang a, a hmingah Luis Suarez an sa - chhungkaw harsa tak an nih avangin retheih hmabak ang maiin tam takin an thlir ngei ang, mahse, hei zawng naupang danglam bik a ni e.

Hetihlaia an retheihzia sawi nan a nu Sandra chuan, "Ballboot leisakna tur pawh kan nei lo," a ti hial! Kum sarih mi lek a nih laiin an ram khawpui ber Montevideo-ah an pem a, Suarez hian unau pianpui mipa dang paruk a nei!

Hetihlai hian youth club Urreta-ah khelin, kum 14 mi a nih chuan an ram club lar leh ṭha Nacional-ah a lut. Suarez hian Nacional tana khel turin hun a duh rei lo - May 2005 a thlen meuh chuan Nacional senior team tana a match hmasa ber chu South American Champions League Copa Libertadores-ah a khel der tawh.

Kawng erawh a tluang vek bik lo - thla li zet a inkhelh hnuah pawh an club tan hian goal a la khung lo a, a club khelhna ṭantute ngeiin an au el ṭhin. Mahse, chungte zawng retheihna paltlangtu Suarez tawp tir turin an tling tawk lo.

Barca tana duan

Nacional fan-ten an au el lai pawhin Suarez a zam duh lo a, khatihlaia Nacional coach Martin Lasarte chuan, "Kha leh chen goal a khung loh chhung zawnga a rilru paukhauhna kha amah hnuk kal turin a ṭangkai hle. Nacional-ah khan player naupang kan neih zingah chuan a ṭha ber a ni a, mahse, fan-te ngainat rawn Bruno Fornaroli leh Martin Cauteruccio te kha an awm ve tho avangin Suarez khan hmun chang tura beih tak tea a beih a ngai a ni," a ti.

Lasarte chuan sawi zaswmin, "Ni khat chu training kan neih zawhah kal pahin kan titi dun a, kan match khelh leh turah bench-a ka dah tur thu ka hrilh a, a thinrim hle. A tana ṭha turin thutlukna ka siam tih kha a hrethiam lo a, mahse, tuma fuih ngai loin training kha midang aia nasain a bei zui.

"Ni khat chu Barcelona tana a la khelh tur thu min hrilh a, a hlawhtlin hma chu a tawp loh tur thu a sawi bawk. Khatihlaia Barca tana khelh phak turm chu theih loh tluk a ni a, mahse, a ban phak loha ngaih kha a hlen chhuak a ni," a ti.

Suarez hian Barca tan season ruk a khelh chhungin match 283 a khelhsak hman a, goal 198 khungin, assist vawi 113 a nei a, La Liga (4), Copa del Rey (4), Supercopa de Espana (2), Champions League, UEFA Super Cup leh FIFA Club World Cup-ah te champion nomawi a chawi.

Sakeibaknei!

Suarez hian Nacional-a a hun hmasa lam hmang ropui lo mah se, coach Lasarte-a rinna leh a rilru paukhauhna zarah hming a chher ta tho a, season a tawp meuh chuan match 27 khela goal 10 khungin league nomawi an chawi.

Uruguay leh Nacional tana Suarez-a khelhpui ṭhin Sebastian Abreu chuan, "Mipa naupang, sakeibaknei rilru pu ang hi a ni mai - hnehna chang reng duh mi a ni a, chutiang tur chuan training a nei reng mai a ni.

"Ni khat chu ka bulah a lo kal a, 'Kan squad-ah hian ka phak lo vek che u tih ka hria a, mahse, ka lehpel vek dawn che u,' a rawn ti ringawt mai a ni," a ti a, Suarez-a tumruhna chu a hlawhtlinna pakhat a nih thu a sawi.

Abreu chuan, "Hun harsa a tawhte kha amah chher hriamtuah a hmang zel a, khatih hunlai pawh khan a tan chuan theih loh hi a awm lo a ni ber mai. Training-naah midangte aia chungnunga lan a tum hran lo a, mahse, a rukin a hranpain training a nei leh a, Uruguay striker awm tawh a zawnga a ṭha ber kha nih a tum a ni," a ti.

Mite aia thawkrim

Suarez-a ṭhian hnai tak, Nacional youth team-a a zirpui leh senior team thlenga a khelhpui Mathias Cardacio chuan a ṭhianpa chu midangte aia thawkrim bik a nih thu a sawi a, tun dinhmun thleng turin kalsan tam tak a neih thu a sawi.

Cardacio chuan, "Nacional youth team kha zan dar 6:00-ah training kan ṭan ṭhin a, mahse, dar 5:00 a rik tawh hi chuan midang ai hmaa lo thlen a, training lo neih lawk a duh avangin min rawn zawng ruai ṭhin.

"Shot zir leh penalty pet lo zirte kha a duh ṭhin - chu chu Luis a zinkawng a ni a, hmasawn zel kha a duh a, tlawm a duh ngai lo. Ka la hriat reng chu Nacional youth team-in 18-0 ngawta Huracan kan hneh ṭum kha a ni - goal 11 ngawt a khung a, mahse, insum kha a tum chuang lo. Khung belh zel kha a duh a ni," a ti.

AC Milan tan pawha lo khel ve zuai tawh Cardacio chuan, "Eng inelna pawh ni se, hnehna chan zel a duh. Football a ni emaw, card khelh emaw pawh ni se, chak zel a duh. Naupang a nih lai aṭang khan a thinlungah hian chak duhna a intuh a ni," a ti thlawt!

Hmangaih Sofia...

Suarez hian khelmual chhung leh pawnah chanchin ngaihnawm tak tak a nei nual - a chang chuan a khelhpuite ban a seh a, a chang leh chi inthliarna lam hawia cheah puh a ni a, Manchester United defender Patrice Evra nen pawh chi inthliarna avang hian thawm an nei hat tawh.

Mahse, khelmuala chak duhna thinlung nena inlan ṭhin, pa kawlhrawng tak nia lang hi hmeichhe awmnem hmaah chuan a lo tuiral ve hle - tuna a nupui Sofia Balbi hi kum 13 a nih lai aṭang tawha a bialnu a ni a, milar leh hausa a nih hnuah pawh a hmangaih hmasa hi a bansan lo.

Suarez-a'n Nacional tana season duhawm tak a hman hnuah khan, kum 2006 khan Dutch top flight club Groningen a zawm a, league macth 29-ah goal 10 a khung. Mahse, Netherlands a pan chhan ber hi a bialnu Sofia hnaiha awm a duh vang niin an sawi!

Kum 15 mi lek a nih laiin a nupui Sofia-te hi Uruguay aṭangin Spain-ah an pem a, Barcelona khawpuiah an inbengbel. Pa lungleng thei tak Suarez hian a bialnu Sofia hnaih thei ang bera awm a duh a, European club lo lang hmasa chu a pan nghal chat.

I kiangah chuan...

Groningen-a Suarez-a khelhpui ṭhin leh amah ang thoa Uruguayan Bruno Silva chuan, "Europe-a a lo kal chhan langsar ber chu a Sofia hnaih thei ang bera awm kha a ni a, level sang ber thleng tur khan a theihtawp a chhuah reng a ni," a ti.

Suarez ang thoa Uruguay striker ropui, World Cup 2010-a Golden Boot dawngtu Diego Forlan chuan, "Suarez-a'n hun harsa a tawh apiangin, amah chawikang turin a nupui Sofia a awm ṭhin a, a chhungte kha amahah an hlim lo ang tih a hlau em em reng ṭhin.

"A nunah thil tam tak a thleng a, Evra nena an chungchang te, inkhelh laia khingpui player a seh ṭum leh a inhliam lai thlengin, Sofia hi a kiangah a awm tlat zel a, Suarez nun khawchhuahna atan a pawimawh em em a ni," a ti - a ngaihnawm asin!

Footballer ropui nih duh, a bialnu kianga awm duh bawk Suarez hian a hlawhtlin duhna leh hmangaihna hmangin hlawhtlinna a chhar a, Sofia kiangah a awm a, hmingthanna leh hausakna tam takin a um zui bawk. Kum 2009 khan Sofia nen hian an innei a, fanu pakhat leh fapa pahnih an nei.

A ṭha ber

Forlan chuan, "World Cup 2010 kan khelh ṭum te, kum 2011-a Copa America nomawi kan chawite khan player danglam bik Suarez chu kan hmu tawh - training session tinah khan hnehna chan a duh a, a ṭha ber nih zel a duh a ni," a ti.

A bialnu hnaiha awm duhna leh hlawhtlin châknain a nawr kal Suarez hian Europe pan tura thutlukna a siam kha a tifuh hle - Groningen-ah hming chherin, season khat hnuah Dutch club ṭha Ajax chu £6.75mtd-in a zawm.

Ajax-ah hian match 159 khelin goal 111 a khung a, assist vawi 68 a nei. Liverpool an lo lang vat a, kum 2011 khan £22.7mtd-in an lei chhuak. Merseyside club-ah fan-te atchilh rawn ni mah se, Barca sawmna hnar zo loin a kalsan - Catalan club hi £64.98mtd-in a zawm.

Suarez chuan, "Liverpool khan an theihna zawng zawngin cham turin min thlem a, mahse, ka nupui chhungte awmna Barcelona-a pem a, inkhelh kha ka naupan laia ka duhthusam a ni tawh a, hnar a harsa a ni," a ti - Luis Suarez, kan dem lo che.