Police hmaa ding tur Rindika 'Chawnpui'
LZ Juice MPL11-ah vawiin chhun dar 12:00 hian Mizoram Police leh Chawnpui FC te an inkhel dawn. Police hi I Day Football champion an nih bakah pathumnaah awm mah se relegation zone-a awm Chawnpui nena an inthlauhna hi point hnih chauh a ni a, Lalrindika Hmar hote hi an chak a nih chuan pathumnaa awm thei dinhmunah an ding.
Tun season MPL11-ah Chanmari FC leh Aizawl FC an che ṭha fal a, team dang parukin hmunruak pahnih an inchuh. MPL champion lai Police meuh pawh an him lo a, Lalbiaksanga Colney hote hian an match hnuhnung pahnihah table mawngphaha awm FC Bethlehem an hmachhawn chungin point khat chauh an hlawh chhuak.
Chawnpui beiseina
MPL11-ah club thar pali ngawt an awm a, hei vang hian MPL9 champion Chawnpui hi a sang pali zinga tel tura ngaih an ni. Mahse, phase 1 khelh zawhah point nga chauh an hmu a, relegation zone-ah an awm. Chutihrualin Chawnpui vanneihna chu Chanmari leh Aizawl FC an kal fawr law law a, pathumnaa awm Mizoram Police pawhin point 10 chauh an la hmuh avangin semifinal kawng zau tak a inhawng.
Coach Rindika'n team chhungah phurna a thlen a, match hmasa bera Sihphir Venghlun an hneh nghal avangin semifinal khel turin beiseina thar an nei tel. Chawnpui hruaitute an phur a, Rindika hi player pathum Jessie Lalmawizuala, Tea Chinzah leh Silvana Lalruatkima te an laksak. Player pathum hi MPL-a tawnhriat nei ṭha vek an ni.
Chawnpui coach Rindika chuan, "Table hnuai lama awm kan nih avangin goal kan chhuah loh phawt a pawimawh dawn. Semifinal lam ngaihtuah thei kan la ni ve lo a, a hnuai lam aṭanga tal chhuah hi kan hna hmasa ber a ni rih. Police hi player ṭha rual awm khawm an ni a, an khelh ṭhat tum chuan dan harsa tak an ni. Kan training kan hlawkpui chuan dang thei turah kan inngai. Kan player-te rilru a dik ṭan a, chak an duh ka ring a, chutiang tur chuan field chhungah an thawhrim pawh ka ring tlat a ni," tiin Vanglaini a hrilh a, semifinal a sawi ri duh lo.
Mahse, Chawnpui hi an chak a nih chuan point 11 hmuin pathumnaah an awm a, semifinal kawng a inhawng tih chu a chiang.
Police ṭha zawk
FC Bethlehem lakah Mizoram Police 2-5 in an mualpho a, an inhmachhawn hnuhnung berah goal awm loin an inhnehtawk. Police hian FC Bethlehem laka point ruk hmuh theih aṭangin point khat chauh an hmu a, an result-ah lawmna tur a awm lo.
Hei vang hian Police-in insiamṭhat tumin residential camp an nei nghal a, an ṭhatpui em tih chu vawiin hian a hriat dawn. Lalbiaksanga Colney hian MPL11-ah Police-a nghet player aiin civil player a hmang nasa a, Chawnpui laka a inrem dan tur hriatthiam a har hle.
FCB laka goal nga chhuahtu F. Lalmuanawma nge lut ang, FCB laka goal chhuah lo Malsawmkima tih aṭangin zawhna a inṭan nghal a, Malsawmfela bench-a dah nge ṭha bul ṭantir, tih thlengin zawhna a awm ang. Chutihrualin ngaihtuah buai ngai loin defender pahnih FC Lalhmunmawia leh Lalhmunmawia bakah midfielder H. Lalbiakthanga leh a ṭul dan a zira forward leh midfield-a chhawr theih F. Lallawmkima te chu lut ngei tura ngaih an ni.
