SYS nge tho chhuak dawn Bethlehem?

LZ Juice MPL11-ah SYS FC-in bul ṭan ṭha mah se inelna chanve a zawh meuh chuan a sang pali zingah an tel pha tawh lo. Lunglei club hian vawiin tlai dar 3:00 hian table mawngphaha awm FC Bethlehem an hmachhawn dawn a, an hneh lo a nih chuan relegation zone-ah an awm thei ang.

SYS hian round linaah Bethlehem nen 1-1 a an inhnehtawk hnuin chak hmel an hmu tawh lo a, match hnuhnung paliah an chak lo vek. Lalmuankima hote hian round 5 zawh hnu khan insiam ṭhat tumin Lungleiah training an nei a, an player ṭhaten I Day Football an hmachhawn lo. Mahse, an fixture a fuh lo a, I Day Football zawhah Chanmari FC vawi hnih an hmachhawn bakah Aizawl FC an hmachhawn a, an khingpui an ṭhat deuh avangin point hmuh hi a harsa hrim hrim.

Lunglei club hian insiamṭhat an tum a nih chuan vawiin hi hun ṭha a tih theih a, table mawngphaha awm Bethlehem an hneh thei lo a nih chuan table hnuai lama awm ve tur reng an ni, tiin a sawi theih ang. SYS hian tun inelnaah goal khung an harsat a, match riat an khelh tawh aṭangin goal 10 chauh an khung a, anmahni aia khung tlem chu Chawnpui chauh an awm.

Chutihrualin Bethlehem hi dah hniam a thiang lo a, Lalhriatpuia Sailo hote hian SYS hi an dah sang bik lo. FCB hian MPL11 Qualifier-ah SYS FC hi an hneh a, qualifier champion ni chungin MPL khel turin an tling. Tun hnaiah Bethlehemin result an nei ṭha a, Police laka point li an hmuh avangin an phur thar hle.

FCB hi an phur ringawt lo a, result ṭha an neih theih nan transfer an hmang ṭangkai. Player thar Daniel Lalliana'n tlarhnungah hmun pawimawh a chang a, Lalnunzira Sailo pawh goal nawr kawngah a ṭangkai. Season ṭantirha Project Veng FC aṭanga an lakluh Lalfamkima'n inrintawkna a nei thar a, FK-a hi SYS tan pawh ven fimkhur a ṭul ang.

Vawiin tlai RG Stadium-a inkhel tur hi club intluk tawk leh point thum mamawh ve ve an ni a, football hmuhnawm thlir tur a awm ang.