Inter Village Futsal a awm dawn: MPL player an tel thei dawn lo

Mizoram Football Association-in October thla hian Inter Village Futsal Tournament 2024 an buatsaih dawn a, inelna hi R. Dengṭhuama Indoor Stadium-ah neih a ni ang. Inelnaah hian Village Council/Local Council khat aṭangin team khat chauh chhuah theih a ni.

Inelna awm tur thu hi MFA chuan Facebook Page kaltlangin September 4, Nilaini khan an ti chhuak a, thuchhuahah hian tun season Mizoram Premier League-a player inziaklut bakah state FA top league-a khel hrim hrim player-te an tel loh tur thu an ziak.

MPL player an khelh theih dawn loh avangin champion tur pawh hriatthiam a harsa sawt dawn. Inlena hnuhnung berah Sihphir Venghlun an champion a, anni hian MPL11-ah club an neih avangin futsal team ṭha tak chhawp chhuah a har ang.

Entry fee hi Rs 2000, a ni a, September 21, Inrinni thleng a pek theih. Entry fee hi Lalrinchhana Fanai, MFA Futsal Committee Asst. Secretary (Gpay +91 84158 81653) hnenah pek tur a ni a, pawisa transfer zawhah transfer-na screenshot hi Gpay-na number Whatsapp-ah thawn tel tur a ni.

Veng/khua inelna a nih avangin inelna buatsaihtu MFA an fimkhur a, dik taka kaltlangpui an tum. Player-te hi voter's ID neihnaah khua/vengah khelh tur a ni a, June 2024 hnulama transfer pawm a ni dawn lo.

Team khatah player 20 aia tam lo leh player pasarih aia tlem lo ziah luh theih ani a, team official-ah mi panga aia tam loh leh mi pathum aia tlem lo ziah luh theih a ni ang a, Physio erawh neih ngei ngei tur a ni.

Inelna chungchanga hriatchian duh nei tan 9862647664/ 8415881653-ah hian zawhfiah theih a ni ang.