Villa ṭantuten UCL ticket man sawisel

Aston Villa-in UEFA Champions League an khel dawn a, club thuneituten ticket man atana an pawisa bituk chu club ṭantuten mi nawlpui ban phak loah an ngai.

Nilaini khan Villa chuan ticket man tur an tar chhuak a, Villa Park-a match li an khelh tur atana en man chu £85 (Rs 9400.50), £94 (Rs 10395.85) leh £97 (Rs 10727.63) a ni a; season ticket neite chuan tan discount awmin, £70 (Rs 7741.59), £79 (Rs 8736.93) leh £82 (Rs 9068.72) a ni thung.

Villa hi kum 41 hnuah Europe inelna sang berah an tel dawn a; an mualah Bayern Munich, Bologna, Juventus leh Celtic te an mikhual dawn. Aston Villa Supporters' Trust (AVST) chuan, "Season liam ta khan club thuneitute nen inbiakna kalpui a ni a, UCL ticket man chu Premier League-a category A man aia sang lo turin kan inrem," tiin thuchhuah an siam.

Mahse, 2024-25 Premier League season-a category A man chu £92 (Rs 10174.66) a ni a, a tlawm ber man chu £55 (Rs 6082.68) a ni. UCL-a £55 man ticket tlukpui chu, discount tiam loin £85 a ni daih a, 55%-in a pung. Villa ṭantute chuan ticket man chu hriatthiam an har an ti hle.

Premier League aṭangin Arsenal, Liverpool leh Manchester City te pawhin UCL an khel dawn. Liverpool inkhel en man chu £30 - £61 inkar a ni a, Man City inkhel en man chu 37.50 - £62.50 inkar niin Arsenal ticket man erawh £74.30 - £106.80 a ni thung.

Chutihrualin UEFA chuan mikhual team ṭantute tan ticket man zat tur an bithliah a, away team ticket hi £50.55 aiin a man a to thei tlo thung. ASVT chuan, "Villa ṭantu ruh kawl ten kum 40 chhung tun hun hi kan nghak a, mah se club thuneitute hian min run a ni," tiin thuchhuah an siam hial.