Hmun ruak tlem a la awm

Tennis season khar nan mipa lamin ATP Finals an khel ṭhin a, hmeichhe lam inelna erawh WTA Finals tih a ni thung - tournament khel phak tur chuan ranking sang zual pariat chin nih a ngai.

World number 4 ni lai Roger Federer-a'n tun season chhungin match a khel dawn tawh lo a, kumin ATP Finals-ah hian world number 9 tan hmun a awm thei dawn tihna a ni. Hmun ruak luah thei zingah hian Diego Schwartzman leh Matteo Berrettini te an inel na hle.

Ranking sang zual - Novak Djokovic, Rafael Nadal, Dominic Thiem, Stefanos Tsitsipas, Daniil Medvedev leh Alexander Zverev te chu tling chiang tawh an ni a, tun hnaia khel ṭha tak Andrey Rublev pawh tling ngei tura ngaih zingah a tel phak.

Grand Slam inelna tih lohah chuan ATP Finals hian ngaihhlut a hlawh, 1000 Masters Tournament ang bawkin an hlut ṭhin hle - champion chuan ranking point 1500 an hmu ṭhin.

Season hmasa khan Greek tlangval Stefanos Tsitsipas a champion a, kuminah hian tun hma lama la hlawhtling ngai lo Nadal tan hun ṭha a inher chhuak a ngem tih chu hunin a rawn her chhuahpui ang.