Fulham mualah Aston Villa chak

Nipui transfer bazara sum hmang hnem Aston Villa-in an beisei ang result an neih chhunzawm zel a, Thawhṭanni zan khan Fulham chu 3-0 in khualmualah an sawp. 

Villa hian an match hmasa berah Sheffield United an lo hneh tawh a, season hmasaa Premier League inhamtang tura league match tawp ber thleng nghah ngai Villa tan chuan league match hmasa pahnih aṭanga point ruk neih hi hlu tak a ni. 

Fulham khelmualah Aston Villa tan an fapa rangkachak Jack Grealish a vul a, English midfielder hian contract thar a ziah hmaa rimtu a ngah chhan pholangin minute lina lekah goal hmahruai a khung. 

Villa tan hian Conor Houri-hane chuan minute 15-naah belhchhahin Tyrone Mings chuan minute 48-naah chak nemnghehna goal a khung bawk - Fulham-in hun tawp thlengin goal an khung ve thei lo a, match thum an khelh tawh aṭangin point an la hlawh chhuak lo. 

Premier League kai thar Fulham-in hnehna an chang thei lo a, Villa laka an tlawm hnu hian club vice chairman Tony Khan chuan fan-te hnenah ngaihdam dilin player thar an lakluh tur thu a sawi zui. 

Tony chuan, "Zanin kan khelh dan avang khan fan-te hnenah ngaihdam ka dil a ni. Premier League kan khel dawn tih a chian aṭang khan centre back kan zawng a, pahnihin Covid-19 an kai a, free a lakluh kan tum pakhat kan chan a, a palina nen buaina a awm bawk. 

"Mahse, ka tiam a che u, player thar kan lalut ang a, hei aia ṭha zawk hian player-te pawh an khel ang," a ti a, English top flight football a inhamtang turin theihtawp an chhuah tur thu a sawi. Villa lakah hian Antonee Robinson leh Kenny Tete chu nipui transfer a Fulham-in a ngheta an lakluh player inlan an ni a, Paris Saint-Germain aṭanga loan hmanga an hawh goalkeeper Alphonse Areola chuan si ban a nghak bawk. 

Kum 2018 a Champions League khel tura an tlin khan Fulham hian pound maktaduai 100 tehmeuh nipui transfer-ah an seng a, mahse Premier League an inhamtang zo chuang lo. 

Coach Scott Parker hoin Championship-ah season khat hun an hman hnuin Premier League-ah an lo kir leh a, Parker chuan, „A tikimtu mai nih kan tum nge, he inelna hmachhawn zel hi kan duh tih hi ngaihtuah fel vat a ngai a ni,“ tiin a sawi.