Beisei pha lo England an chak ṭawk

Football ram inelnaah England chanchinin ngaihven a hlawh ṭhin a, khelmualah erawh beisei an pha ṭhin lo. Inrinni zan inkhelah pawh a danglam lo, Gareth Southgate-a hoten Laugardalsvollur-ah Iceland 1-0 in an hneh hram a, injury time-ah Raheem Sterling-a'n penalty ṭangin goal awmchhun a khung.

England manager Southgate-a'n squad a puan aṭangin thawm a ring nghal a, Harry Maguire buaina aṭanga sawi 'hot' chhoin Marcus Rashford inhnukdawk chu a sehhmeh a ni a, Jack Grealish koh a nih mai loh avangin sawiseltu an tam hle.

Harry Winks a inhnuhdawh avangin Grealish koh an ni a, a chhehvel aṭanga thlir chuan England squad a ṭhat hmel hle. Premier League-a star rual awm khawm an ni a, Bundesliga-a player hmuhnawm Jadon Sancho an neih bawk avangin Gylfi Sigurdsson leh Johann Berg Gudmundsson tel lohna Iceland awlsam taka hneh thei tur an ni.

ṭantu zingah tawnhriat nei tam an tlem hle. Raheem Sterling-a chiah vawi 50 a la inlan a, Kyle Walker, Harry Kane, Eric Dier leh Jordan Pickford te chu ilan tam leh deuh an ni mai a, rama aia club lama hming chher vek an ni.

Midfield lai uaptu Declan Rice, Phil Foden leh James Ward-Prowse te ram tana inlan belhkhawm chuan vawi 10 a pel awrh a, club level leh international level a dan avangin a tak ramah chuan dah san theih an ni lo.

England player zingah Jadon Sancho chu player hmuhnawm awmchhun a tih theih a, chutihrualin Kane-a'n a class a pholang bawk. Tottenham striker hian Sterling a cross chu a tlawh lut a, offiside vangin pawm a ni lo. VAR a awm loh bakah replay a ṭhat tawk loh avangin referee thutlukna sawi zui theih a ni lo.

Southgate-a hoten goal khung an harsat a, chance ṭha an insiam thei lo. Nikum November thlaa Kosovo 4-0 a an hneh kha ram anga an khelh ho hnuhnun ber a nih a, England 'team thar' an la inhre bel tawk lo.

Harsatna belhchhah turin yellow card hmu tawh Kyle Walker-a'n ṭul lo zetin Arnor Traustason ball chhuhsak tumin a tlawh a, minute 70-naah Manchester City defender hi hnawhchhuah a ni. Southgate-a'n game plan thlakin Sancho aiah Trent Alexander-Arnold te a luhtir a, goal beiseiin Mason Greenwood a luhtir bawk.

England an vannei a, minute 89-naah Sterling-a ball petin Sverrir Ingason kut a fuh a, referee-in penalty a pek bakah Iceland player a hnawt chhuak. Replay aṭanga ennawn erawhin Iceland tan referee thutlukna a na khawp ang.

Man City forward Sterling-a'n penalty hi goal laiah a pet a, a goal chiah chiah. England goal khung lawm boruak pawh a reh hmain Liverpool defender Joe Gomez-a'n box chhungah substitute Holmbert Fridjónsson a ti tlu a, penalty a chawi. Iceland tana penalty pettu Birkir Bjarnason-a'n goal zawna a pet loh zarah England an vannei a, 1-0 in an chak.

England awmna group-a inkhel dangah Belgium-in Jason Denayer leh Dries Mertens te goal hmangin Denmark 2-0 in an hneh. Three Lions hian Thawhlehni zan dar 12:15-ah Denmark an hmachhawn dawn a, Belgium-in Iceland an mikhual ve bawk ang.

Gareth Southgate chuan, "Minute 20 chhung kha chu  kan khel ṭha a, kan goal khung kha pawm turah ka ngai. A hnu lamah erawh kan goal hmaah kan hriam tawk lo a, ṭul loah red card kan hmu. Penalty hmanga goal kan khung hnuah inzirna tur kan nei leh a, ṭul loah penalty kan chawi. A tawpah kan vannei ta hram a, tuna kan tihsual ang hi a thleng nawn tawh tur a ni lo," tiin an khelh danah a lawm loh thu a sawi.