Eriksen ka la ring ngam - Conte

Antonio Conte-a‘n beiseina sang tak nen Tottenham aṭangin Christian Eriksen chu Inter Milan-ah a lalut a, Denmark international midfielder hian a beisei ang erawh chuan a la khel chhuak lo - inkhel bul ṭantu zingah a tel phak meuh rih lo a ni.

Inter hian Serie A season thara an match hmasa berah Fiorentina 4-3 in an hneh hram, he inkhelah pawh hian Eriksen hi bench aṭanga dah luh a ni a, khelmual a luh chinah erawh danglamna a siam, chak lo tura ngaih kha hnehna an chan theih nan a thawhhlawk hle.

Conte chuan, "Kan hnena a rawn kal tirh nena khaikhin chuan tunah chuan a tlangnel tawh hle, player theihna nei sang tak a nih bakah training-na hmunah a thawkrim em em bawk. "Amahah rinna ka nghat ngam a, engtik niah emaw chuan tun hma lama a ṭhatna ang kha a hlawhchhuah leh ngei ka beisei tlat a ni," tiin a sawi.

Season hmasa khan Inter hi league-ah pahnihna an ni a, match 38 khelh zawh hnuah champion Juventus an phak lohna chu point khat chauh a ni. Chutihrualin Old Lady hian match khelh hmabak pahnih nei chungin nomawi an chawi tawh.

Tun season-ah pawh Inter leh Juve hi inel na leh tura ngaih an ni a, an elpui dang Lazio, Napoli leh AC Milan pawh hlauhawm phak tura ngaih an ni. Season dang zawng aiin league nomawi inchuh boruak a ngaihnawm a rinawm.

Italian manager Conte kaihhruai Inter hian zanin dar 9:30-ah tun season a an league match hnihna ni turin Benevento an lenchilh ang. Europa League khelh vangin Inter hian team dang aiin season bul an ṭan tlai bik a ni.

Champions League khel phak zinga mi Lazio chuan dar 1:15-ah anmahni ang bawka UCL khel Atalanta an mikhual dawn a, anni pahnih hi a sang pali zinga awm inchuh tur an nih avangin inkhel a hmuhnawm ang.