Arsenal-in Ceballos hawh nawn

Arsenal chuan season hmasa lama loan hmanga an hawh tawh Real Madrid midfielder Dani Ceballos chu season thar atan an hawh chhunzawm leh dawn, Spanish club tana training chhunzawm hman tawh hi Britain lama a kir leh hnuah khung hran ngai loin a inkhel nghal thei.

Kum 24 mi Ceballos hian season hmasa khan North London club tan match 37 a khelhsak a, manager thar Mikel Arteta enkawlna hnuaiah nasa takin hma a sawn tih pawh a lang - FA Cup a chawi theih nan player pawimawh zingah a tel.

Arsenal hian September 12, Inrinni tlai hian Premier League season thar an khel ṭan tawh dawn, tunah inbuatsaihna an nei ngawrh hle. Inrinni zan khan Aston Villa nen friendly match an khel a, 3-2 in Gunners an chak lo.

Captain Pierre-Emerick Aubameyang-a'n goal hnih khung mah se, Villa hi Jacob Ramsey-a goal hnih leh Douglas Luiz goal khat hmangin an chak.

Arteta-a'n a player thar Willian leh William Saliba te a inlantir a, inkharkhip hnua match pangngai la khel leh lo Mesut Ozil pawh khelmual chhungah a inlan bawk - German international hlui hi season tharah a hmel kan hmu chhunzawm dawn a ni mai thei.