East Bengal an bazar nasa
ISL-a a vawi khat nana inlan tur East Bengal-in Shree Cement an thawhpui avangin sum an ngah thar a, team indinthar tur an nih bawk avangin transfer bazar-ah thawm an nei deuh reng.
Kolkata club hian tun hnaiah Welsh striker Aaron Amadi-Holloway, Irish midfielder Anthony Pilkington, English defender Danny Fox, German midfielder Matti Steinmann leh Congo international Jacques Maghoma an lakluh thu an puang.
Amadi-Holloway hi A League club Brisbane Roar aṭangin an lalut a, Kum 27 mi striker hian English football a League Two leh League One lamah a hun tam zawk a hmang a, Oldham Athletic leh Shrewsbury Town tan pawh a lo khel tawh.
Republic of Ireland tana vawi kua inlan tawh Anthony Pilkington hian Manchester United academy lamah pawh a hun a lo hmang tawh a, season hmasa khan Wigan Athletic tan a khel.
Kum 32 mi midfielder hian Norwich City tan Premier League-ah season thum a lo khel tawh a, Cardiff City tana Championship lama season li zet hun lo hmang tawh a nih bawk avangin a tawnhriat ringawt pawh hi ṭangkaipui tham a ni ang.
Huddersfield Town tana a khelh laiin 2010-11 khan League One PFA Team of the Year-ah a lo lang tawh. Kum 34 mi Danny Fox hi Everton youth system chhuak a ni a, Burnley leh Southampton tan Premier League a lo khelh tawh avangin a nep lo tih a chiang.
Scotland international hlui hi 2008-09 khan Coventry City tana khelin Championship Team of the Year-ah a lo lang tawh a, Nottingham Forest tan Championship lamah a lo inlan tawh bawk.
Kum 25 mi midfielder Matti Steinmann hi German Bundesliga club Hamburger SV academy aṭanga inzirchhuak a ni a, Hamburg-ah hian a career-a a hun tam zawk chu hmangin season hmasa khan a chhuahsan.
Germany tan age level hrang hranga lo inlan tawh player hian season hmasa khan A League club Wellington Phoenix chu season khat chhung atan a zawm a, a contract zawh hnuah Indian football lam hawiin East Bengal a zawm ta a ni.
Kum 32 mi Maghoma hian season hmasa khan Birmingham City tan Championship lamah match 18 zet a la khelh theih avangin a ṭha tawk ang tih a chiang a, Sheffield Wednesday leh Burton Albion tan a lo khel ṭhin tawh bawk.
Kolkata club hian Narayan Das an lalut bawk a, India tana vawi 29 inlan thei left back hian season hmasa khan Odisha FC tan Indian Super League a khel.
East Bengal hian Brisbane Roar aṭangin English right back Scott Neville chu loan-in an lo lalut tawh bawk.