Ka chak lo teuh hle - Quartararo

Catalunya MotoGP a hnehna changtu Fabio Quartararo chuan tlan hmabak la ngah se chuan chak lo mai thei dinhmun a din thu a sawi a, vanneih thlak taka a chak avangin rider championship lamah beisei a neih san thu a sawi bawk.

Season tir lam intlansiak pahnihah Quartararo hian hnehna a chang a, a hnu lamah erawh a chak hleithei lo - a zawna vawi nga chhung pakhatna a nih loh hnuah tunah chuan hnehna a chang ve leh tawh.

Yamaha rider Quar-tararo chuan, "Palina ni chungin bul ka ṭan kha a ni a, chumi hnua hnehna ka chang thei hi chu a lawmawm bik hle. Tih sual nei lo ka ni bik lo a, ka elpui dangte chet fuh tawk loh ni a nih avangin ka vannei ta ber.

"Tawnhriat ngah Valentino Rossi pawh a chesual a nih kha, kei ngei pawh kha lap tlan hmabak dang pakhat la awm belh se la chuan vanduai thei niah ka in ngai, intlansiak boruak kha hriatthiam a harsa hle a ni," a ti.

Rider championship-ah Quartararo hian point 108 hmuin hma a hruai mek, pahnihnaah chuan Suzuki bike khalhtu Joan Mir awmin an inthlauhna chu point riat chauh a ni. October 11, Pathianni hian Bugatti Circuit-ah French Grand Prix an tlan leh dawn, hmahruaitu Quartararo-a‘n a chung bera awm chungin anmahni ramah inelna a hmachhawn dawn.