World Cup leh a chhehvel

ICC World Cup 2015 an khel zo a, match 49 zet khelh niin chhinchhiah tlak leh hriat reng tlak a thleng nual. Cricketer ropui tak takin an World Cup hnuhnung ber atan an hmang a, star beiseiawm tak tak rawn ding chhuak an awm bawk.

Kar ruk chhung World Cup khelh a nih chhungin record thar a piang nual a, double century te hial kan hmu a, cricket ngainatu tan chuan World Cup hriatreng tlak leh hmuhnawm tak a ni.

Mipui ngaihven

World Cup

Kumin World Cup hi ṭum dang zawng aiin ngaihventu an tam a, khawvel pumpuiah entu a ngah hle. Group stage match India leh South Africa in an khelh ṭumin Melbourne Cricket Ground-ah mipui pungkhawm an ṭhahnem a, mi 8,6000 zetin an en. Final Australia leh New Zealand in an khelh ṭum khan mi 90,300 velin a hmunah an en thung. India leh Pakistan inkhel khan ngaihventu a ngah filawr a, India-ah ringawt mi maktaduai 228 velin enin khawvel pumpuiah tluklehdingawn 1.5 in an en bawk.

ICC World Cup hi Television channel 44 in ram 220-ah live in an pechhuak a, ṭawng chi sarih in commentary a awm ṭhin. World Cup website ringawt pawhin tlawhtu a ngah a, kar ruk chhung khan mi maktaduai 26.25 velin an tlawh .Cricket World Cup puala application an siam chu mi maktaduai 3.6 in an download a, ram 48-ah sports application hman hnem ber a ni. Media lam mi 1,400 in World Cup kha an chhim bawk a ni.

Record thar a piang hnem

Kumin World Cup-ah record thar hmuh tur a awm nual a, West Indies leh Zimbabwe inkhelh ṭumin Chris Gayle a che ropui a, West Indies batsman hian run 215 vawchhuakin World Cup-a double century vawchhuak hmasa ber a ni. Mahse, Gayle record hi a ding rei lo. New Zealand tan Martin Guptill chuan West Indies an khelh ṭumin run 237 a vawchhuak a, World Cup match khata run siam hnem ber a ni.

Gayle hian record dang a la siam cheu a, double century a siam dawn hian six vawi 26 zet a hlapchhuak. World Cup-a match khata six run hlapchhuak hnem ber record a ni.

Kumin World Cup-a batsman te'n century an hlapchhuah zat hi vawi 38 niin 2011 World Cup aia century hlapchhuah tam na hi 14 lai a ni. Run vuakchhuah zawng zawng zat hi 23,531 niin record ding lai a khumna zat hi run 2,198 zet a ni.

Afghanistan leh Australia inkhelh ṭumin Australia in run 417 an vawchhuak a, World Cup-a run siam hnem ber record a ni. India in Bermuda laka run 413 an lo siam tawh chu Australia hian an rawn khum a, World Cup-a chak chiang ber an ni zui bawk. An chak na zat hi run 275 a ni.

Quarterfinal-ah Nrew Zealand in West Indies run 143 in an hneh a, World Cup knockout stage-a chak chiang ber record a ni.

South Africa captain AB de Villiers chuan West indies an khelh ṭumin ball 64 lekah run 150 a vawchhuak a, World Cup mai ni lo ODI chanchina run 150 siam rang ber record a ni.

Sri Lanka veteran Kumar Sangakkara chuan match li chhung a zawnin century a hlapchhuak a, ODI chanchina century vawi li a zawna siam thei hmasa ber a ni.

New Zealand captain Brendon McCullum chuan World Cup-a half century siam rang ber record thar a siam a, run 50 hlapchhuak tur hian ball 18 bak a mamawh lo.

Players chawl an tam

Kumin World Cup-ah an ODI match hnuhnung ber khel cricketer an tam a, cricket khawvela hming langsar tak tak lo ni tawh ṭhinte an ni hlawm.

Kum 29 leka upa nichungin Zimbabwe batsma zinga ropui ber pawl Brendan Taylo chuan ODI khelh a chawlhsan a, a World Cup match hnuhnung berah century hlapchhuak mahse a team in India an hneh chuang lo. Australia captain Michael Carke-a'n ODI a chawlhsan a, test match erawh a la khel ang. Sri lanka cricketer ropui pahnih Mahela Jayawardene leh Kumar Sangakkara te an chawl bawk. New Zealand left-arm spinner Daniel Vettori pawhin an World Cup match final hmasa ber a ram a khelpui hnu in cricket a chawlhsan tur thu a puang ve leh bawk.

Sum sen a tam

Kumin World Cup ang reng reng a cricket World Cup sum tamna a la awm lo. Lawmman atana sum fai sen ral hi dollar maktaduai 10 a ni. Kum 2011 World Cup nena sum a in tam hleih zatna ringawt hi hi 25% lai a ni.

Champion team Australia khan dollar maktaduai thum leh nuai kua singsarih sangnga ($ 3,975,000) an dawng a, pahnihna New Zealand in sum an dawn zat pawh a tam tham a, dollar maktaduai khat leh nuai sarih singnga an dawng thung.

Semi-final a chak lo team pahnih Inida leh South Africa khan dollar nuai ruk ve ve an dawng a, hei hi India pawisa chuan nuai zathum sawmsarih pangnga leh singsarih zali sawmsarih a ni.

Quarter final a chak lo team pali te khan dollar nuai thum ($300,000) ṭheuh an dawng a, group match-a chak zawk apiang khan dollar sing li leh sang nga ($45,000) an dawng a, group stage-a tla te khan dollar sing thum leh sang nga ($35,000) ṭheuh an dawng thung.