Player hmuhnawmte

Kumin World Cup-ah run hmuh tur a tam a, batsman ho World Cup tiin an ko fiam hial. Batsman che ṭha tak tak zingah New Zealand batsman Martin Guptill aia run siam hnem an awm lo a, West Indies an khelh ṭuma double century hlapchhuaktu hian World Cup chhungin run 547 a hlapchhuak a ni.

A world Cup hnuhnung ber hmangtu Sri Lanka veteran Kumar Sangakkara a che ropui. Match sarih chauh khel chungin run 541 a vawchhuak a, ODI match li chhung a zawna century siam thei hmasa ber a ni. South Africa captain AB de Villiers-a'n a vawikhat nan a team World Cup final thlenpui zo lo mahse run 482 zet vawchhuakin South Africa chet ṭhat chhan a ni.

Batsman che ṭha tak tak kara 'Player of the tournament' rawn la nalh tu erawh Australian fast bowler Mitchell Starc a ni. Kum 25 leka upa nichungin match riatah wicket 22 a la thei. Bowler zingah kum naupang lam an langsar zawk a, New Zealand fast bowler kum 25 mi tho Trent Boult pawh a che ṭha a, wicket 22 tho a la. An ni pahnih tih loha wicket la hnem ber erawh Nagpur tlangval Umesh Yadav a ni thung a, Indian fast bowler hian match riatah wicket 17 a la a ni.