Stoichkov-a'n Van Gaal a ngaisang lo

Barcelona player ropui ṭhin Hristo Stoichkov chuan Man­chester United manager ni mek Louis Van Gaal chu engmah lo mai a nih thu sawiin, amah zahna pakhatmah a neih loh thu a sawi.

LVG-a'n Barcelona a enkawl laia an player pawimawh zinga mi Stoichkov chuan, "LVG hian ka zah a phu lo, hnawmhnawk ang mai a ni. Barca ka khelh laiin vawikhat chu ka inhliam a, ka nupui hnenah kalin,'Engtinnge a ni ang hi pasalah i neih theih zawk,' tiin a han zawt kher a ni," tiin a pu hlui chu a ei lo hle.

Bulgarian footballer ropui chawl ta chuan, ''Barcelona aṭanga CSKA Sofia ka pan chhan pawh kha amah vang hian a ni. A hnuai khelh kha nuam ka ti lo," a ti.

LVG hnuaia assistant coach ni ṭhin Jose Mourinho erawh Stoichkov chuan a fak hle a, "Ṭawng lettu satliah emaw assis­tant coach ve mai mai a ni lo. Kha tih lai aṭang daih tawh khan football hi a manin a hrethiam em em a, Bobby Robson ai khan a ngaihtuahna aṭha zawk daih tih kha aman a hre lo mai mai a ni," tiin Chelsea boss chu a dah sang hle.