Zaninah Netherlands Vs Italy

Zanin dar 12:15 hian Amster-dam Arena-ah Netherlands leh Italy te an inkhel dawn. Nations League League A group 1 inkhel dangah Bosnia and Herzegovina leh Poland te an inkhel ve bawk ang.

Nations League hmasa ber finalist Oranje-in an match hmasa berah Steven Bergwijn hmangin Poland 1-0 in an hneh a, Italy erawh Bosnia leh Herzegovina nen 1-1 in an inhnehtawk. 

Coach lailawk Dwight Lodeweges-a'n inhliam vangin Inter Milan defender Stefan de Vrij leh Juventus defender Matthijs de Ligt te a chhawr thei lo. Amaherawhchu Virgil van Dijk a dam ṭha a, Liverpool defender hoin Joel Veltman, Nathan Aké leh Hans Hateboer ten goal venhim hna an thawk.

Poland-in Robert Lewan-dowski an chhawr lo a, Dutch tlarhnung tan hna a awlsam sawt. Chutihrualin chak turin goal khung a ngai a, Memphis Depay leh Quincy Promes te goal hmaah an hriam tawk lo. Minute 61-naah Tottenham forward Bergwijn-a'n goal awmchhun a khung a, hnehna an chang.

Netherlands tan Donny van de Beek pawh a inlan a, minute 74-naah goal khungtu Bergwijn a rawn thlak. Manchester United lak thar Van de Beek hian thil ropui a rawn ti lo a, chutihrualin midfield-a inkhel an thunun theih nan hna a thawk ṭha a, Ajax-a a khelhpui ṭhin Frenkie de Jong nen an inkawp rem hle.

Roberto Mancini-a'n tarmit a bun loh avangin  Giorgio Chiellini bench-ah a dah a, Lazio defender Francesco Acerbi a inlan phah. Azzurri hi Euro 2020 qualifying match 10 an khelhah an chak vek a, Bosnia lakah erawh goal an chhuah hmasa.

Serie A striker ṭha zinga mi Edin Dzeko-a'n minute 57-naah Bosnia goal hmahruai a khung a, Stefano Sensi hmangin Italy-in an sut. Inkhelh banah Mancini chuan, "Chiellini ka rawn a, eng match zawk nge a khelh duh tih ka zawt. Bosnia hmachhawn a duh thu sawi mah se tarmit ka bun loh avanga ka thai sual avangin Netherlands nen bul a ṭan zawk ang," tiin tihsual a neih thu hi a zep lo.