Ka thawhrim vang a ni - Saina

India badminton super star Saina Nehwal chuan World number 1 a nih theihna chhan chu a tumruh leh thawhrim vang a nih thu a sawi.

India hmeichhe zinga World number 1 ni thei hmasa ber Saina chuan, "He hmun thleng tur hian hun harsa tam tak ka paltlang ve a, a awlsam lo hle a ni. A bik takin nikum khan ka khel ṭha tawk lo a, ka beidawng lek lek ṭhin. Mitam takin ka thlen theih chin vawrtawp thleng tawh leh inkhelh chawlhsan tawh mai tur tein min hrilh ṭhin. Mahse ka beidawng duh lo a, ka bei hram hram a tun hun hi ka thleng ta a ni," a ti.

Saina coach Vimal Kumar chuan, "Kei chuan a khelh dan tur ka ruahmanin ka hrilh ṭhin, a taka lantir tu chu amah hi a ni. World number 1 nih hi a phu a, he hmun thleng tur hian a nghak rei a, a bei nasa bawk a ni," tiin a sawi.

Pathianni khan Saina hian Yonex Indian Super Series tournament final-ah world champion pawh lo ni tawh Thailand star Ratchanok Intanon chu 21-16, 21-14 a hnehin a champion a ni.